Deputeti socialist, Erion Braçe, shprehet se nëse seanca e 21 korrikut në Kuvend dështon në miratimin e reformës në drejtësi, atëherë zgjidhje mbetet referendumi ose zgjedhjet e parakohshme.
Ligjvënësi socialist tha për Report Tv se Kuvendi duhet të shpërndahet në momentin që nuk arrin të miratojë draftin kushtetues të reformës në drejtësi.
“Nëse nuk miratohet reforma, parlamenti duhet t’i japë mundësi popullit që të vendosë mbi ndryshimet kushtetuese. Ata duhet të zgjedhin mes opsionit të Berishës dhe Bashës që vettingu të zgjidhet nga një grup njerëzish që nuk monitorohet nga askush dhe zgjidhja jonë është që të monitorohet nga ndërkombëtarët. Për mua, nëse Kuvendi nuk arrin të votojë reformën në drejtësi duhet t’i japë mundësi popullit me referendum. Nëse nuk e bën as këtë gjë, më mirë të shpërndahet”, u shpreh Braçe.
Ai theksoi se Kuvendi duhet të kryejë votim nominal dhe të hapur seancën e 21 korrikut.
“I kam kërkuar të votojmë me votë nominale, që shqiptarët të kuptojnë se kush është pro dhe kundër kësaj Reforme”, tha ai.
