Grupi i ekspertëve të nivelit të lartë vijoi të martën diskutimin e rekomandimeve të Komisionit të Venecias për reformën në drejtësi dhe posaçërisht të ndryshimeve në Kushtetutë që lidhen me organizimin dhe funksionimin e Gjykatës Kushtetuese.
Pas tryezës së sotme, e zhvilluar pa praninë e mediave, konstitucionalistja e njohur, Aurela Anastasi, pjesë e grupit të ekspertëve të lartë, tha për mediat se shpreson që drafti i reformës të mund të përmbyllet brenda janarit.
“Ne duam ta përfundojmë sa më shpejt reformën për të qënë korrekt dhe me kërkesat e Komisionit të Venecias që drafti t’i dërgohet sa më shpejt dhe sipas kërkesës së këtij organizmi. Shpresojmë që ta mbyllim brenda janarit”, tha Anastasi.
Duke folur për ndërhyrjet në Kushtetutë që lidhen me funksionimin e Gjykatës Kushtetuese, ajo tha se si formulë deri më tani mbizotëron formula kushtetuese që parashikon kompetenca të ndara të organizmave kushtetues për emërimin e një të tretës së anëtarëve të kesaj Gjykate. “Ajo qe ka mbizotëruar dhe mbetet dhe tani eshte formula tre+tre+tre (anetare), të zgjedhur nga Presidenti, Kuvendi dhe pushteti gjyqësor”, sqaroi ekspertja Anastasi. Ndërsa kryetari i Gjykatës Kushtetuese, shtoi ajo, ka shumë mundësi që të mbetet një zgjedhje e vetë anëtarëve të Gjykatës.
Sipas Anastasit, grupi i ekspertëve të lartë pritet të përmbyllë sot diskutimin për Gjykatën Kushtetuese për të vijuar më pas me gjykatat e zakonshme dhe organet e tjera të drejtësisë.
