Një referendum kombëtar në Hungari për çështjen e kuotave të numrit të migrantëve në BE nuk do të konsiderohej i ligjshëm nga Brukseli, thanë sot juristët e njohur hungarezë të së drejtës ndërkombëtare, Laszlo Valki dhe Attila Mraz, lidhur me referendumin e kërkuar nga kryeministri Viktor Orban.
Sipas tij, bëhet fjalë për një problem që do të ndikonte në të ardhmen e Hungarisë dhe, për këtë qëllim, duheshin konsultuar votuesit.
Ndërkohë, juristët thonë se kushtetuta hungareze, e ndryshuar nga vete qeveria e Orbanit, ndalon referendumet mbi traktatet apo detyrimet ndërkombëtare, pra, propozimi i kryeministrit do të pengohej nga Gjykata Kushtetuese e vendit, madje, as Bashkimi Evropian nuk do ta konsideronte të ligjshëm.
“Kemi të bëjmë me një blof”, shkruante sot gazeta liberale hungareze ”Nepszabadsag”.
Sipas eurodeputetit, George Schoepflin (Fidesz), objektivi i Orbanit është politik, që të tregojë një konsensus të gjerë kombëtar ndaj çështjes së migrantëve.
Kryeministri hungarez, Viktor Orban njoftoi dje organizimin e një referendumi për planin evropian të shpërndarjes së refugjatëve midis shteteve anëtare të BE-së, ku qeveria e tij është kundër këtij vendimi.
“Qeveria vendosi organizimin e një referendumi për çështjen e kuotave të detyrueshme të shpërndarjes së refugjatëve”, deklaroi gjatë një konference shtypi konservatori Orban.
Qeveria e tij ka shfaqur pakënaqësinë e saj në muajin dhjetor pranë Gjykatës Evropiane kundër kuotave të rishpërndarjes të miratuara në shtator 2015 nga BE-ja. Kryeministri nuk parashtroi një datë të saktë për këtë çështje por bëri të ditur se projekti i referendumit u depozitua sot në Komisionin Kombëtar Zgjedhor.
Pyetja e drejtuar për zgjedhësit hungarezë do të jetë “Dëshironi që Bashkimi Evropian të dekretojë një shpërndarje të detyrueshme të shtetasve me kombësi johungareze në Hungari pa miratimin e Parlamenti hungarez ? “, sqaroi Orban.