Ish-menaxheri Harry Redknapp ka pohuar se Jose Mourinho është pajtuar të marrë drejtimin e Manchester United-it gjatë kësaj vere. Trajneri portugez, i cili është i papunë që prej shkarkimit nga Chelsea në muajin dhjetor, në javët e fundit është raportuar se do të kalojë në Old Trafford. Në një intervistë për radion amerikane Sirius XM, Redknapp ka thënë se është çështje kohe kur Mourinho do të konfirmohet si menaxher i ri i Unitedit. “Nuk ka shkuar mirë për Louis van Gaalin te Manchester Unitedi”, ka thënë Redknapp. “Ka qenë katastrofë për të. Nuk kam dyshim për këtë. Nga njerëzit që njoh, duket se Jose Mourinho te Unitedi është punë e kryer”.
