Cheesecake me kos është një ëmbëlsirë që ka gjithmonë sukses kur ia shërbeni miqve tuaj. Kjo ëmbëlsirë e shijshme e gatuar me kos dhe pana mund të shërbehet në fund të vaktit duke i hedhur sipër pak reçel ose çokollatë të shkrirë. Këtë ëmbëlsirë të shijshme mund ta gatuani edhe një ditë më parë duke e ruajtur në frigorifer.
Për bazën duhen:
150 gr biskota të thata
100 gr gjalpë
pak lëkurë portokalli e grirë ose kanellë (fakultative)
Për mbushjen duhen:
250 gr kos i bardhë i trashë
250 gr pana e freskët
150 gr sheqer pluhur
1 pako vanilje pluhur
marmelatë ose çokollatë e shkrirë
Përgatitja e Cheesecake
Fillimisht përgatisim bazën e ëmbëlsirës. Marrim biskotat dhe i grijmë në grirësin elektrik. I hedhim në një enë qelqi dhe shtojmë në të gjalpin e shkrirë dhe pak lëkurë portokalli të grirë ose pak kanellë (nëse ju pëlqen shija mund ta shtoni ose përndryshe mos shtoni asgjë).
I përziejmë mirë bashkë e më pas i hedhim në një tavë ku kemi vendosur letër furre më parë. E nivelojmë mirë dhe e shtypim fort nga sipër me fundin e lugës ose me dorë në mënyrë që të kemi një bazë të fortë.
Vendosim tavën në frigorifer përreth 30-40 minuta.
Ndërkohë përgatisim mbushjen e ëmbëlsirës.
Në një enë qelqi hedhim panën dhe fillojmë ta rrahim me rrahësin elektrik derisa të jetë bërë si shkumë.
Në një enë tjetër rrahim me rrahësin elektrik kosin me sheqerin pluhur dhe vaniljen derisa të përzihen mirë së bashku. Më pas i bashkojmë me kujdes së bashku panën me kosin e rrahur.
E trazojmë ngadalë këtë masë kremoze dhe e hedhim mbi bazën e biskotave që ndërkohë është ftohur mjaftueshëm në frigorifer. E nivelojmë mirë me lugë kremin mbi të dhe fusim ëmbëlsirën në frigorifer ku e lemë përreth 8-10 orë që të mpikset.
Është më mirë që ëmbëlsirën ta gatuani një ditë përpara dhe të rrijë në frigorifer përgjatë gjithë natës. Pasi është ftohur e heqim me kujdes nga tava dhe e presim në feta.
E shërbejmë ëmbëlsire cheescake me reçel sipër ose me çokollatë të shkrirë.
Arti i Gatimit