Pas akuzave të PD se prej dy vitesh në tendera shpallet fituese firma e ilaçeve Trimed, e cila sipas tyre është e lidhur me Ministrin e Shëndetësisë, ka reaguar qeveria. Në një postim në portalin e saj, Transparenca.al qeveria ka sqaruar se firma në fjalë operon që nga viti 2004 dhe se PD, qëllimisht i ka mëshuar vlerës monetare në tenderat në fjalë. Sipas PD-së, firma ka fituar mbi 2 milionë euro në tendera, por Transparenca.al saktëson se shifra është e pasaktë, sepse ka brenda dhe TVSH 20%, në kushtet kur është botërisht e ditur se për barnat dhe ilaçet TVSH është e përjashtuar.
Më poshtë postimi i plotë i Transparenca.al
Që prej vitit 2004, vit në të cilin është themeluar, kompania “Trimed” ka operuar në fushën farmaceutike me barna për përdorim farmaceutik dhe barna spitalore, si dhe është aktive në fushën e produkteve ortopedike, dentare dhe materialeve laboratorike. “Trimed” përfaqëson 19 kompani të njohura multinacionale si AstraZeneca, Boheringer Ingelheim, Stada Group, Dompe, Bayer Diabetes, Biomet, FL Medical, etj.
Sipas fotografisë së publikuar në daljen publike të zyrtares së PD-së, dallohet qartësisht se tek vlerat financiare të paraqitura është shtuar edhe vlera e TVSH-së prej 20%, kur dihet botërisht se barnat janë aktualisht të përjashtuara nga TVSH. Kjo është bërë qëllimisht për të rritur artificialisht vlerën financiare të përfituar nga kompania “Trimed”.
Vlerat reale të tenderave të përfituar në vite nga Trimed janë:
Viti Vlera në lekë
2010 46,640,267
2011 50,097,620
2012 74,373,330
2013 46,803,888
2014 76,702,991
2015 66,885,929
Për sa i përket procedurave me negocim, pa shpallje të kryera nga Ministria e Shëndetësisë në vitin 2015, sqarojmë se janë kryer dy herë, për periudhat maj – qershor dhe shtator – tetor, për blerje të barnave për nevoja emergjente të spitaleve ndarë në 42 lote/barna në total. Kompania “Trimed” rezulton fituese vetëm në 4 lote.
Gjithashtu, për vitin 2013 janë blerë medikamente për QSUT për nevoja emergjente me negocim 329 lote/barna, nga të cilat kompania “Trimed” ka fituar 9 lote/barna. Ndërsa për vitin 2014 janë blerë barna për nevoja emergjente të disa spitaleve për periudhën e fund vitit, të ndara në 159 lote/228 barna. Kompania “Trimed” ka qenë fituese vetëm për 16 barna.
Më poshtë paraqitet pjesëmarrja e kompanisë “Trimed” në procedurat me negocim të Ministrisë së Shëndetësisë për tre vitet e fundit:
Viti Barna Vlera e përfituar në lekë
2013 9 10,395,690
2014 16 4,027,004
2015 4 10,746,973
Bazuar në shifrat e mësipërme, rezulton se kompania “Trimed” ka përfituar këto dy vite si fituese në tendera gjysmën e vlerës të cilën pretendon Partia Demokratike. Gjithashtu, siç edhe tabelat tregojnë, fondet e marra me negocim pa shpallje të kryera nga Ministria e Shëndetësisë janë dhjetëra herë më të vogla se vlerat e përftuara në tendera.
