Ka reaguar Partia Socialiste pas akuzave të Gert Bogdanit nga selia blu. Në njoftimin e shpërndarë për mediat PS thotë se PD e ka të pamundur të pranojë që sot ka mbi 93 mijë shqiptarë të siguruar më shumë se në vitin 2014.
Gjithashtu thotë se Panairi i Punës është një sinjal shprese për çdo qytetar.
“Panairi i Punës 2015 është një sinjal shprese për çdo qytetar shqiptar që është sot në kërkim të një vendi pune. 5000 vende pune ofrohen në këtë panair në industrinë e shërbimeve, tregti, industrinë përpunuese, sistemin bankar etj. Kushdo që është i interesuar, përfshi këtu Partinë Demokratike, mund të shkojë dhe ta verifikojë këtë fakt lehtësisht.
Sot ka mbi 93000 shqiptarë të siguruar më shumë se në vitin 2014.
Sot ka 10 zyra të Shërbimit Kombëtar të Punësimit, të cilat janë funksionale dhe realisht ofrojnë shpresë dhe gjejnë zgjidhje për qytetarët. Ndërkohë që deri në vitin 2013 këto zyra kishin një numër më të madh punonjësish sesa numri i qytetarëve që punësonin.
Sot fondi i mbështetjes së punësimit, i cili po jep rezultatet e tij të para, është transparent dhe nuk shpërndahet më mbi bazë të preferencave apo interesave të atyre që e shpërndanin atë deri në 2013.
Nuk presim që Partia Demokratike t’i pranojë këto fakte. Ajo që na intereson është rritja e numrit të njerëzve të regjistruar për të kërkuar punë çka do të thotë se qytetarët na besojnë dhe se shpresa për punësim është rritur, falë edhe rritjes reale të punësimit dhe politikave të ndërmarra gjatë këtyre dy vjetëve.”, thuhet në njoftimin e PS.
