Pas akuzave të kryetarit të Partisë Demokratike Lulzim Basha nga qyteti i Fierit se rreth 1000 familje nga Cakrani kanë emigruar për shkak të kushteve të vështira të jetës dhe papunësisë së lartë, ka reaguar me anë të një deklarate për shtyp Partia Socialiste me anë të deputetes Blerina Gjylameti.
Gjylameti thotë se Basha nuk ka hallin e shqiptarëve, por i shfrytëzon ata për interesat politike të Partisë Demokratike.
“Lulzim Basha nuk ka hallin e shqiptarëve, por i shfrytëzon ata për interesat politike të Partisë Demokratike. Një politikan i përgjegjshëm sot duhet të qetësonte qytetarët, por Lulzim Basha i ka tradhtuar qytetarët, ndaj tenton të nxisë destabilitet përmes retorikës që synon të nxisë largimin e sa më shumë njerëzve nga vendi.
Kjo retorikë e Lulzim Bashës nuk i shërben Shqipërisë dhe as nuk ndihmon shqiptarët.
Nga ana tjetër Gjylameti i rijukton qytetarëve se Lulzim Basha nuk mbajti asnjë nga premtimet e bëra në 2011 e për këtë arsye i trembur nga vota qytetare nuk rikandidoi për bashkinë e Tiranës
“Është për të ardhur keq Kryetari i Bashkisë së Tiranës që për 4 vjet tradhtoi qytetarët dhe nuk mbajti asnjë premtim, sot gjen kurajën për të bërë fushatë, e për më tepër të bëjë fushatë me një temë kaq antikombëtare.
Nuk flet për rrugët e pandriçuara dhe plot gropa në Tiranë që në katër vitet e fundit nuk e kanë ndjerë dorën e Bashkisë dhe sot i bëjnë qytetarët e pasigurtë. Nuk flet për premtimet e pambajtura për më shumë punësim, më shumë parqe, për tramin e Tiranës që është vetëm në ëndrrat e Lulzim Bashës.
Tashmë që Lulzim Basha u tërhoq i trembur nga rikandidimi, çdo shqiptar e ka marrë vesh se edhe vetë Lulzim Basha nuk i beson premtimeve që bën.
Është paaftësia e Lulzim Bashës në çdo detyrë që ka patur arsyeja pse ai ndërron kaq shpesh pozicione. Duke mos ditur të bëjë asgjë, nuk i mbetet gjë tjetër veçse të tentojë diçka të re, pasi nuk ka asnjë shans të përballet me ndonjë arritje në detyrat e mëparshme.”
Sa i përket ikjeve nga vendi Gjylameti u shpreh:
“Sa i përket rastit në fjalë, shifrat e institucioneve shqiptare dhe partnerëve ndërkombëtarë tregojnë se situata është nën kontroll dhe një përmirësim i dukshëm është ndjerë dita ditës sa i takon çështjes së largimeve.”, mbyll dekratën e saj deputetja socialiste.
