Policia e Shtetit ka reaguar sërish pas akuzave të përsëritura të Partisë Demokratike për lidhje të krerëve të uniformave blu me bandat e drogës. Në deklaratën e shëprndarë për mediat nga policia thuhet se rezultatet në luftën kundër paligjshmërisë dhe drogës janë vetë përgënjeshtrimi ndaj akuzave pabaza të policisë. Policia thotë se është institucioni më i sulmuar nga opozita, duke shtuar se ata që sot luftojnë uniformat blu I bëjnë shërbim të mirë krimit.
Deklarata e Policisë:
Policia e Shtetit është institucioni më i sulmuar nga opozita.
Pothuaj çdo ditë PD ka akuzuar çdo drejtues policie për lidhje me krimin.
Por rezultatet në luftën kundër paligjshmërisë dhe veçanërisht rezultatet në luftën kundër kultivimit të drogës, janë përgënjeshtrimi më i fortë për këto akuza.
Policia e Shtetit fton edhe njëherë PD-në që për çdo informacion të pretenduar dhe për këdo zyrtar që sipas saj është i implikuar, t’i drejtohet Prokurorisë.
Policia e Shtetit mbetet e vendosur të luftojë krimin dhe paligjshmërinë.
PD-ja duhet të vendosë nëse do të rreshtohet në krah të Policisë për të luftuar krimin, apo do të qëndrojë në anën tjetër të llogores duke luftuar Policinë.
Ata që sot luftojnë Policinë, i bëjnë shërbimin më të mirë krimit.
/a.m.
