Modelja Hailey Baldwin Bieber ka folur për herë të parë për tragjedinë që ndodhi në xhirimet e filmit “Rust”, në të cilin po luante xhaxhai i saj, Alec Baldwin. Ajo tha se ndihej zemërthyer për ngjarjen e rëndë.
Ajo e ka publikuar deklaratën e saj përmes një storie në Instagram ku shprehet se është tronditur nga kjo tragjedi dhe i shpreh ngushëllimet e saj familjarëve.
“I dërgoj gjithë dashurinë time familjes së Halyna Hutchins. Kjo është një tragjedi vërtet e paimagjinueshme dhe shkatërruese. Mendimet e mia janë gjithashtu me Joel Souza teksa është duke u rikuperuar”, ka shkruar ajo.
Tragjedia ndodhi të enjten e kaluar. Teksa ishte në xhirime, aktori Alec Baldwin qëlloi aksidentalisht kinematografen, Halyna Hutchins, dhe plagosi regjisorin e filmit, Joel Souza.
Aksidenti ndodhi për shkak të shkrepjes së një pistolete që aktori po përdorte për rolin. Vetë aktori ka thënë se nuk kishte fjalë që të përshkruante tronditjen dhe trishtimin në lidhje me aksidentin tragjik.
Eksperti i armëve, Bryan Carpenter për New York Post, ka nënvizuar se aktori i famshëm Alec Baldwin ka shkelur rregullin numër një për sigurinë e armëve që “e mbushur apo jo, një armë edhe nëse je në skenë nuk i drejtohet kurrë një njeriu tjetër”.
Kjo mund të bëjë që aktori të përballet me probleme të tjera ligjore në të ardhmen.
Hollivudi u trondit nga kjo ngjarje, me disa aktorë dhe kineastë që lëshuan deklarata për kushtet e punës në xhirime dhe sigurinë e të gjithëve.
/a.r