Përmes një deklarate për shtyp, OSHEE ka reaguar në lidhje me akuzat e PD për tenderin e marrë nga djali i Valentina Leskajt që parashikonte trajnimin e punonjësve të këtij institucioni. OSHEE thotë se procedurat kanë dështuar dy herë dhe se nuk është lidhur asnjë kontratë.
“Shpifja e radhës që u lëshua sot është e turpshme. OSHEE nuk ka lidhur ende një kontratë për trainimin e punonjësve, pasi procedura e parë dhe e dytë dështoi për mosplotësim të kritereve e për mangësi të ofertave. Ndërkohë, trainimi i punonjësve të të gjitha niveleve të kompanisë, që përfshin 5.800 punonjës dhe 15.500 module trainimi është një domosdoshmëri në vazhdën e transformimit rrënjësor të shërbimit. Por, Partia Demokratike s’ka asnjë shans ta kuptojë këtë përderisa e vetmja fushë ku kjo parti është e trainuar është fusha e shpifjes”, thuhet në deklaratën e OSHEE.
