Drejtori i OSHEE, Ardian Çela, ka reaguar sot në lidhje me përmendjen e emrit të tij nga deputeti Vladimir Kosta.
Në një prononcim të shpërndarë për mediat, Cella thotë se nuk ia ka plotësuar kërkesat Kostës për të përfituar tendera.
“Shpreh keqardhje të thellë për prononcimin e deputetit Vladimir Kosta, por nuk jam i keqardhur që nuk i’a kam plotësuar kërkesat e tij absurde për të fituar në rrugë të paligjshme tenderë të shpallur nga OSHEE. Fatkeqësisht nuk më vjen e papritur kjo shfaqje vulgariteti vetediskreditues që flet vetë për nivelin e Vladimir Kostës. Sulmin e tij në vigjilje të finalizimit të Reformës në Drejtësi e marr si kompliment për kompaninë dhe për drejtimin tim me ligjshmëri dhe transparencë. Reforma në Drejtësi ende pa u miratuar po tregon se çfarë vlere të madhe ka për të ndarë njerëzit që duan shtet, drejtësi, rregulla nga ata që duan të vazhdojnë në rrugën e vjetër të përfitimeve të paligjshme” – shkruan Çela.
Një ditë më parë, deputeti socialist në një letër dërguar Ramës ku njoftonte largimin e tij përmendte emrin e Çelës si prurje e re dhe pa merita në Asamble.
