Deputeti socialist, Koço Kokëdhima, hedh poshtë zërat për përplasje mes tij dhe kreut të grupit parlamentar socialist, Gramoz Ruçi. Në një intervistë për “Ora News”, Kokëdhima ripërsëriti edhe njëherë se mes tij dhe Ruçit nuk ka pasur asnjë përplasje. Në prononcimin e dhënë gjatë zhvillimit të Kongresit të PS-së, Kokëdhima u shpreh se në këtë takim të gjerë të socialistëve do të gjenerohen ide dhe programe, të cilat do të bëjnë të mundur përmirësimin e punës në të gjitha nivelet.
Intervista:
Kokëdhima: Ndoqëm fjalimin e kryeministrit i cili tha dhe mjaft ide për të ardhmen. Do të veçoja Axhenda Shqipëria në vitin 2025 e cila do të jetë një program, debat, bashkëbisedim,konsultim i gjerë brenda partisë dhe mes qytetarëve prej të cilës do kemi shumë ide për të përmirësuar punët në të gjitha nivelet në Shqipëri.
Ka një propozim për referendum për çështjen e mandatit të kryetarit të partisë dhe një kërkesë nga një grup deputetësh për të shkuar në zgjedhje në garë siç parashikon statuti, sipas jush sot si duhet të vlerësohej kongresi?
Këto janë çështje që do diskutohen dhe do marrin një zgjidhje në Kongres.
Sot si rrallëherë Kryeministri Edi Rama ka përmendur me emra njerëzit që kanë kontribuar mjaft në Partinë Socialiste, mes tyre dhe kreun e grupit parlamentar Gramoz Ruçi për të cilin është aluduar së fundmi se ka pasur një përplasje mes jush në grupin parlamentar. Mund të na zbardhni si qëndron e vërteta?
Nuk ka pasur asnjë përplasje mes meje dhe z. Ruçi. I kam bërë të qarta këto gjëra.
Shfrytëzoj rastin që ju kam në transmetim live. U votua ditën e enjte për çështjen e mandatit të zotit Rakip Suli. Ndryshe nga ju nuk u dërgua në Gjykatën Kushtetuese. Pse mendoni se PS veproi në mënyra të ndryshme për një çështje që duket se ishte e njëjtë?
Nuk janë në mënyra të ndryshme por nuk e keni kuptuar saktë. Ajo çështje që u diskutua për z.Suli është ndryshe nga çështja që ka lidhje me mua.
Pra asnjë qejfmbetje për votat që shkuan për z.Suli dhe për votat që shkuan për ju?
Absolutisht, unë në mbledhjen e grupit parlamentar kam propozuar vetë mosdërgimin e çështjes së z.Suli në Kushtetuese.
