Deputeti socialist Fidel Ylli ka reaguar pas akuzave të analistit Ilir Demalia i cili deklaroi se Ylli së bashku me deputetin Tom Doshi e kishin kërcënuar me armë këtë të fundit në vitin 1995.
Në një intervistë për Panorama deputeti Ylli e cilëson mashtrim këtë deklaratë të Demalias, ndërsa tregon episodin e ndodhur 23 vjet më parë në Bar West.
Sipas Yllit, ai asnjëherë nuk ka mbajtur armë, ndërsa e ka nxjerrë Demalian jashtë lokalit të tij për shkak të zhurmës dhe shqetësimit që po u krijonte klientëve.
Ndërkaq lidhur me përmendjen e emrit të Tom Doshit nga Demalia, Ylli thotë se ai nuk ka lidhje fare me këtë histori.
“Filloi të bërtiste: E mor Fidel, çfarë ke, je mërzit se të kam sharë Gramozin, mikun tënd?! Unë i kërkova që të ulte zërin.
Ti shaj këdo, i thashë, je bërë dhe shkrimtar, por këtu je në lokalin tim, prandaj ule zërin.
Ai vazhdoi të bërtiste, unë e kapa nga dora, as më shkonte ndërmend ta godisja dhe e nxora jashtë lokalit.
Nuk ka lidhje Toma fare. Toma ishte klient i lokalit dhe nuk ka qenë fare në këtë komunikim timin me Syçin.
Kur dolën jashtë, kalon një patrullë policie. Syçi vazhdonte të bërtiste. Unë prapë i fola, i thashë mos bërtit se është dhe Policia jashtë dhe ne jemi çuna lagjeje.
Unë nuk pyes për Policinë dhe as për njeri. Policët që ishin jashtë, të patrullës, e dëgjuan.
Ti nuk pyet për Policinë, hajde pak me ne në rajon të sqarohemi dhe e morën. Kjo është e gjithë historia e kërcënimit me armë, që thotë Syçi”– shprehet Fidel Ylli. /b.d
