Organi zyrtar i shtypit të PD, gazeta Rilindja Demokratike, ka vijuar në akuzat e saj kundrejt pronarit të TV Klan, Aleksandër Frangaj, duke e quajtur atë një sekser sypatrembur të qeverisë.
Akuzat e RD vijnë një ditë pas lajmit të publikuar në lidhje me votën kundër të deputetëve të PD në komisionin e medias, për liçencat digjitale.
“Sandri pikëllohet vetëm kur nuk merr atë që do dhe e do patjetër edhe në kundërshtim me ligjin.
Përfaqësuesit e opozitës në AMA janë aty për të zbatuar ligjin, jo për të ndjekur interesat e pronarit Sandër.
Ky sekser sypatrembur i qeverisë, mund t’ia ketë dalë sot të marrë një rrahje shpatullash nga Edi Rama për sulmin që i bëri opozitës, por nuk ka bindur dot askënd.
Edhe bahçevani i tij, me të cilin Sandri kalon shumë kohë, e di se shefi nuk e ka hallin tek qëndrimi i PD për rastin Ksera, por për qëndrimin e PD tek AMA, ku janë interesat e financat.” Shkruan RD.
Ja shkrimi i plotë i RD
Televizioni i Sandrit sulmoi dje opozitën me atë që është tipar i njohur i këtij ekrani, qitja me batare të marrë nga një frëngji, duke qepur trashë e tymthi ca argumente pa lidhje, gjithë duke fshehur arsyen e vërtetë të këtij hakërrimi.
Arsyeja është se Sandri dje nuk mori me forcë si gjithnjë e në kundërshtim me ligjin, licencën dixhitale.
Dashuria e thellë dhe e papritur e Sandrit për zotin Ksera, shndërrohet aty për aty, në një qortim të rëndë ndaj PD dhe zotit Basha, pikërisht ditën kur në zbatim të ligjit përfaqësuesit e opozitës në AMA nuk pranuan të votojnë një shkelje të rëndë. Ligji është i qartë dhe neni 62 sqaron çështjen e pronësisë.
Një temë delikate për të cilën ka ndjeshmëri edhe komuniteti ndërkombëtar.
Dhe Sandri i Klanit është haptazi në kundërshtim me ligjin.
Pikëllimi për zotin Ksera mund ta bëjë dikë të mendojë se ndjenja humane po përshkojnë Sandrin, çka do të ishte lajm, përveçse habi e madhe.
Por jo, kjo s’ka si të ndodhë.
Sandri pikëllohet vetëm kur nuk merr atë që do dhe e do patjetër edhe në kundërshtim me ligjin.
Përfaqësuesit e opozitës në AMA janë aty për të zbatuar ligjin, jo për të ndjekur interesat e pronarit Sandër.
Ky sekser sypatrembur i qeverisë, mund t’ia ketë dalë sot të marrë një rrahje shpatullash nga Edi Rama për sulmin që i bëri opozitës, por nuk ka bindur dot askënd.
Edhe bahçevani i tij, me të cilin Sandri kalon shumë kohë, e di se shefi nuk e ka hallin tek qëndrimi i PD për rastin Ksera, por për qëndrimin e PD tek AMA, ku janë interesat e financat.
Një gazmend i madh e ka kapur sot dhe bahçevanin kur ka parë turfullimën në lajme kundër PD, dhe me siguri i ka thënë atë që ia përsërit çdo ditë veshëve të etur të Sandrit: i madh je shef.
Partia Demokratike është sigurisht në favor të dixhitalizimit dhe ka bërë jo pak në këtë drejtim, por sigurisht është dhe do të jetë kundër përqendrimit, kundër monopolizimit, pra kundër inkriminimit të medias.
Përsa i takon zotit Ksera, që paturpësisht përdoret nga Sandri i Klanit, Partia Demokratike ka pasur që në fillim dhe ka vetëm një qëndrim.
Qëndrimi është i qartë se PD nuk bëhet pengesë e hetimit për korrupsion, në asnjë rast, për asnjë zyrtar apo ish-zyrtar të sajin. Por nga ana tjetër, ne kemi kërkuar me vendosmëri që Prokuroria të zbatojë ligjin dhe vetëm ligjin, procedurën e jo porositë e telefonatat e Edi Ramës, i cili më kot shpreson se anë të presioneve në drejtësi dhe klaneve të tij, do të largojë vëmendjen nga hajdutëria e qindra milionë eurove, hajdutëri që feks kudo në çdo tender, koncesion, privatizim, në çdo zyrë të qeverisë, në dogana e tatime.
