Historia e motrave Kajtazi, nga Durrësi, ishte këtë verë një nga lajmet më të transmetuara nga mediat audiovizive dhe ato të shkuara. Pavarsisht moshës së tyre të mitur, lajmet me fotot e tyre u pasquruan në çdo edicion lajmesh apo në faqet e para të gazetave në shumicën e rasteve pa asnjë çensurim.
Nisur pikërisht nga ky rast, por që në fakt përfaqson një fenomen të vazhdueshëm në vendin tonë, Ministria e Mirëqenies Sociale dhe Rinisë, si institucioni që bashkërendon punën për mbrojtjen e të drejtave të fëmijës dhe mbikqyr zbatimin e legjislacionit në këtë drejtim, i ka shprehur shqetësimin për mënyrën e pasqyrimit në media, Autoritetit të Mediave Audiovizive. Me anë të një letre drejtuar kreut të AMA-s, Gentian Sula, ministri Klosi thekson se parimi i mbizotërimit të interesit të fëmijës para çdo interesi tjetër, e drejta e jetës dhe e zhvillimit, dhe mbrojtja e fëmijës nga cënimi i paligjshëm i moralit dhe i dinjitetit janë parime bazë të të drejtave të fëmijëve që duhen respektuar nga mediat në transmetimin e lajmeve apo kronikave ku përfshihen fëmijët.
Më tej ai thekson se kuadri legjislativ dhe rregullator për mediat audiovizive përcakton qartë përgjegjësitë e mediave në respektimin e të drejtave të fëmijëve. “Në mënyrë të veçantë, mediat kanë detyrimin të ndalojnë transmetimin e programeve që mund të dëmtojnë seriozisht zhvillimin fizik, mendor ose moral të të miturve, duhet të respektojnë me rigorizitet privatësinë e të miturve si dhe duhet të shmangin çdo raportim apo transmetim, që çon direkt apo indirekt në identifikimin e çdo fëmije që mund të jetë ose është viktimë, dëshmitar, apo i akuzuar për kryerjen e një vepre penale”, – thuhet në këtë letër.
“Transmetimi i figurës apo detajeve mbi ngjarjen të cilat bëjnë lehtësisht të mundshëm identifikimin e plotë të fëmijës, janë në kundërshtim të plotë me parimet kryesore që media duhet të respektojë. Mosrespektimi i këtyre detyrimeve është në shkelje të Konventës së OKB-së “Për të drejtat e Fëmijës”, duke u bërë një faktor pengues për rehabilitimin e fëmijës dhe riintegrimin e tyre në një jetë normale”, – thuhet në letrën e ministrit Klosi.
Gjithashtu ai bënë të ditur se gjatë monitorimit të vazhdueshëm për ngjarjet dhe rastet e pasqyruara në media ku janë përfshirë fëmijët, është konstatuar shkelje të këtyre parimeve dhe të të drejtave të fëmijëve, veçanërisht në rastet që kanë prekur fëmijë si viktima apo si autorë të veprave penale. Për sa më sipër, ministri Klosi i kërkon AMA-s, marrjen e masave konkrete për respektimin dhe mbrojtjen e të drejtave të fëmijëve gjatë transmetimeve të operatorëve të shërbimeve audiovizive, në përputhje me ligjin.
