Një rast tronditës që ka marrë vëmendje të gjerë në rrjetet sociale u trajtua këtë të enjte në emisionin “Shije Shtëpie” në Tv Klan, ku mjeku okulist Rubin Topi paralajmëroi për rrezikun serioz që paraqet puthja e fëmijëve në fytyrë, veçanërisht pranë syve.
Sipas tij, një fëmijë ka humbur syrin pasi u infektua me virusin herpes nga një i afërm që e puthi, duke shkaktuar një infeksion të rëndë okular me pasoja të pakthyeshme për shikimin.
Katerina Trungu: Është fotoja e një fëmijë, i cili ka fashuar syrin pasi është puthur nga një i afërmi i tij, që ka herpes…
Rubin Topi: Nga një ia afërmi i tij, që kishte herpes në buzë.
Katerina Trungu: Dhe i ka shkaktuar problem serioz, aq sa mund të ketë probleme me shikimin?
Rubin Topi: Këto tre-katër ditët e fundit ky rast është bërë jashtëzakonisht viral. Është në fakt një zakon shumë i rrezikshëm që ne të puthim një fëmijë afër zonës së syrit, edhe në fytyrë. Sepse herpesi është një virus latent, ai fle në një gjendje të përgjumur, në ganglonin nervor. Kur ne na bie imuniteti, na shfaqet herpesi në buzë. Pra e ka puthu fëmijën dhe ia ka transmetuar në sy. Ashtu siç preket buza nga herpesi mund të preket edhe syri, nga i njëjti virus. Kjo ka krijuar një hulçer te ky fëmijë dhe ka sjellë infeksion shumë të avancuar të të gjithë globit okular dhe fatkeqësisht ai sy është humbur. Pra cili është mesazhi: nuk ka zakon më të rrezikshëm se sa të puthësh një fëmijë, sidomos te zona në fytyrë, e aq më tepër në zonën që është afër me syrin. Sidomos persona që e dinë që kanë probleme me herpesin, që kanë historik apo edhe që janë me një gjendje virale. Mundësisht duhet evituar.
