Pas raportimit në Kuvend dhe përgjigjes së pyetjeve të deputetëve, nga kreu i Prokurorisë së Përgjithshme Olsian Çela, demokratët kanë shprehur rezerva mbi deklaratat e tij.
Në fjalën e saj, deputetja Jorida Tabaku ngriti alarmin mbi gjendjen e ekonomisë shqiptare për shkak të pastrimit të parave në ndërtim dhe uljes në 30% të vlerës euro për shkak të pastrimit të parave dhe korrupsionit. Tabaku theksoi se nuk mori asnjë përgjigje mbi pyetjet e ngritura ndaj Çelës, ndërsa risolli në vëmendje një deklaratë të bërë në Komisionin e Ligjeve nga Çela në vitin 2022.
“Deklarata juaj në maj 2022 te Komisioni i Ligjeve, ishte sikur shteti hiqte dorë. Sipas jush Prokuroria më e madhe ajo e Tiranës ka 7 prokurorë në seksionin e pastrimit të parave që nuk bëjnë asgjë. Në Tiranë janë dhënë 1.9 mln metra katrorë leje ndërtimi. Shifër e jashtëzakonshme, e papërballueshme për sektorin bankar dhe kompanitë.
Në raportin e SPAK të 2023 thuhej se grupet kriminale po përdorin hapësirën ligjore për të pastruar para. Sot ka kompani që marrin leje ndërtimi për kulla 200 mln euro me zero bilanc. Çfarë mund të bëhet për të ndalar këtë që po ndodh me sektorin e ndërtimit. Pastrimi i parave, korrupsioni kanë ulur vlerën e euros në 30% dhe kjo është kambanë alarmi për ekonominë shqiptare. A duhet krijuar qark i mbyllur se ku shkojnë paratë? Situata sot është dhe më keq. Kriza që ka sot ekonomia shqiptare është pastrimi i parave në ndërtim”, tha Tabaku.
Nga ana e tij, deputeti Agron Gjekmarkaj i konsideroi përgjigjet e kryeprokurorit Çela si diskurs të ndërtuar mbi paradoks.
Ai theksoi se teksa raporti i OSBE/ODIHR konstaton shuarje të kufirit mes partisë dhe shtetit, organet e drejtësisë shqiptare nuk e vërejnë atë.
“Përgjigjet e tij stilema që përdoren rëndom. Diskursi i tij i ndërtuar mbi një paradoks. Pjesëtarët e OSBE/ODIHR konstatojnë shuarje të kufirit mes partisë dhe shtetit ndërsa organet e drejtësisë nuk e vërejnë.
Lukunia e patronazhistëve ka bërë kërdinë me manipulim vote dhe organet e drejtësisë nuk e shohin, mjaft trishtuese. Kryetarët e bashkive, drejtorët, administrata publike ushtrojnë presion mbi votën dhe organet e drejtësisë nuk e vërejnë. E çuditshme. Shumë mandate u përcaktuan nga vota e krimit, patronazhimit”, tha ai.
