Ministria italiane e Drejtësisë, në një raport të detajuar që ka publikuar së fundmi, lidhur me hartën e shtrirjes së organizatave të ndryshme mafioze italiane anembanë botës, vë në dukje se ku janë përkatësisht të përqendruara secila prej tyre, ku shtrihen dhe cilat janë veprimtaritë e paligjshme që zhvillojnë ato kryesisht.
Raporti nuk lë jashtë as Shqipërinë, e cila së bashku me Kolumbinë, konsiderohet si një pikë kyçe nga ku importojnë mafiet italiane drogën, me qëllim trafikimin e saj drejt tregjeve të Evropës Perëndimore.
Raporti vëren se mafia më e pranishme në Shqipëri, është ajo puljeze, e njohur si Sacra Corona Unita, e përfshirë kryesisht në veprimtari të pastrimit të parave, infiltrimit në ekonominë legale dhe të trafikimit të drogës.
Pjesë nga raporti në fjalë
Prania e mafieve italiane në botë përqendrohet në destinacionet tradicionale të emigracionit italian (Gjermani, Amerikë e Veriut, Zvicër, Belgjikë, Australi) dhe në nyjet kyçe të trafiqeve kryesore (Spanja dhe Holanda).
‘Ndrangheta është organizata më më tepër prirje jashtë Italisë, me nivele pjesëmarrjeje të larta ose shumë të larta në të gjitha destinacionet e cituara. Camorra mbetet më e përqendruar në Evropën qendrore, ndërsa Koza Nostra është e pranishme edhe në kontinentin Amerikan.
Më e kufizuar dhe e përqendruar (sidomos në zonën e Ballkanit) është kriminaliteti i organizuar puljez.
Detajet
Analiza e veprimtarive konfirmon se Spanja, Gjermania dhe Holanda janë nyje të rëndësishme për importimin e drogës (të cilat mbërrijnë kryesisht nga Kolumbia dhe Shqipëria me destinacion tregjet evropiane, ato të Amerikës së Veriut dhe të Australisë), por edhe vende pastrimin e parave të paligjshme dhe infiltrimin në ekonominë legale (së bashku me Zvicerën, San Marinon, Mbretërinë e Bashkuar dhe Amerikën e Vetriut).
Paraqitet disi i ndryshëm, tabloja e veprimtarive të tjera të paligjshme (sidomos kontrabanda e cigareve dhe e mallrave të falsifikuara), në të cilën luajnë një rol kyç vendet e prodhimit dhe burime të importit si Kina, Greqia dhe shtete të tjera të zonës ballkanike dhe të Evropës Lindore.
Të dhënat lidhur me mafiet të marrë një për një tregojnë se ‘Ndrangheta ka një prani të përqendruar në Gjermania, Spanjë, Holandë, Kanada dhe Australi, ndërsa veprimtaritë e saj të pastrimit të parave dhe të infiltrimit në ekonominë legale realizohen kryesisht në Gjermani, Zvicër dhe në Amerikën e Veriut. Kurse Camorra ka një përqendrim më të madh në Spanjë, mbitëgjitha për sa i takon veprimtarive të lidhura me trafikun e drogës, ndërsa në kuadrin e kontrabandës së cigareve dhe të falsifikimit prania kamorriste më e fortë shënohet në Kinë dhe në Evropën Lindore (sidomos në Rumani dhe Poloni).
Tipari dallues i mafies siçiliane është një prani e përqëndruar në Gjermani dhe në SHBA. Në kuadër të trafikut të drogës Koza Nostra është tejet aktive në Kolumbi, ndërsa pastrimi i parave dhe investimi i parave të paligjshme drejtohen kryesisht në Spanjë, në Kanada dhe në parajsat fiskale si Zvicra dhe Bahamasi.
Në rastin e kriminalitetit puljez është i dukshëm një përqëndrim i posaëëm, përveç Gjermanisë, edhe në zonën ballkanike (Në Shqipëri, Mal të Zi, Greqi, Hungari dhe Rumani). Kjo lidhet kryesisht me veprimtaritë që lidhen me importimin e cigareve kontrabandë dhe të mallrave të falsifikuar, ashtu sikurse edhe me trafikun e drogës, me destinacion tregjet e Evropës Perëndimore. Pastrimi i parave dhe infiltrimi i saj në ekonominë legale është i orientuar kryesisht në Zvicër, në Shqipëri dhe në Mbretërinë e Bashkuar./shqiptarja
a.ç
