Republika e Shqipërisë renditet në krye të listës sa i takon nivelit të pastrimit të parave për vitin 2015. Pushtetarët e korruptuar shqiptarë dhe krimi i organizuar po nxitojnë të pastrojnë dhe fshehin jashtë vendit paratë e krimit dhe të korrupsionit. Instituti i Bazelit për Qeverisjen, një institut zviceran mjaft i njohur në arenën ndërkombëtare, i cili bashkëpunon me OKB, KiE, Bankën Botërore si dhe jep kontributin e tij për forcimin e shtetit ligjor, ka publikuar ditët e fundit raportin për indeksin e pastrimit të parave në rang global. Sipas të dhënave të tij, Shqipëria është ngjitur mes 5 shteteve të para në Evropë sa i përket këtij fenomeni.
Nga 152 shtete në total në rang botëror, vendi ynë renditet i 86-ti. Por sa i përket shteteve të Evropës, Shqipëria ndodhet në vendin e pestë, pas Ukrainës, Turqisë, Greqisë dhe Bosnje-Hercegovinës. Nëse bëhet një krahasim me fqinjët tanë Maqedoninë, Serbinë apo Malin e Zi ne ndodhemi në krye. Krahasuar me të njëjtin raport të një viti më parë, indeksi i korrupsionit ka pësuar rritje. Në vitin 2014 indeksi për Shqipërinë ishte 5.54, ndërsa në vitin aktual është 5.56. Sipas të dhënave të raportit, kjo tregon se numri i zyrtarëve a personave të tjerë që kanë bërë pastrim parash ka pësuar rritje. Sa i përket renditjes së përgjithshme botërore, në krye qëndrojnë Irani me Afganistanin dhe pas tyre renditen shumica e shteteve afrikane, aziatike dhe amerikano-jugore. Ndërkohë vendet e Evropës, dhe më konkretisht ato skandinave, kanë indeksin më të ulët të pastrimit të parave. Vendet me një fenomen të tillë më të pakët janë Estonia e Finlanda.
