Liria e medies në disa vende të BE-së është në “pikën kritike”. Ka qenë ky përfundimi i raportit vjetor të Unionit të Lirive Civile për Europë, i cili ka zbuluar se liria e medies në disa vend etë BE-së është në rënie të vazhdueshme, e cila shkon paralelisht me rënien e sundimit të ligjit.
Unioni i Lirive Civile për Evropën (Liberties) tha në raportin e tij vjetor për lirinë e medies, të përpiluar me 37 grupe të të drejtave në 19 vende, se tendencat alarmante të identifikuara më parë vazhduan në vitin 2023, megjithëse legjislacioni i ri në mbarë BE-në mund të ofrojë shpresë për përmirësim.
“Liria e medies është qartësisht në rënie të vazhdueshme në të gjithë BE-në – në shumë vende si rezultat i dëmtimit ose neglizhencës së qëllimshme nga qeveritë kombëtare. Rënia e lirisë së medies shkon paralelisht me një rënie të sundimit të ligjit. Ekziston një lidhje e ngushtë midis të dyjave. Ky është libër lojërash i regjimeve autoritare. Legjislacioni i ri i BE-së për medien “ka potencial”, por duhet të zbatohet siç duhet”, tha Eva Simon, oficere e lartë e avokimit në “Liberties”.
Raporti vuri theksin te kërcënimet, frikësimi, survejimi dhe dhuna ndaj gazetarëve, si dhe kufizimin në lirinë e shprehjes.
“Liberties” rekomandoi që Komisioni Evropian të vëzhgojë nga afër zbatimin nga shtetet anëtare të një Akti të ri Evropian për Lirinë e Medies, për të cilin Simon tha se krijon një bazë ligjore për përmirësimin e lirisë së medies.
“Shumë do të varet nga qeveritë dhe autoritetet kombëtare, por akti do të thotë se rastet tani mund të sillen përpara një gjykate evropiane që do të vendosë se çfarë do të thotë vërtet pavarësia e medies, mbikëqyrja e gazetarëve e kështu me radhë,” tha ajo.
Gazetarët në vende si Kroacia, Franca, Gjermania, Greqia dhe Italia u përballën me sulme fizike në vitin 2023, ndërsa në Hungari dhe Sllovaki gazetarët u përballën me abuzime dhe kërcënime nga politikanët e zgjedhur.
Në Rumani dhe Suedi, policia nuk arriti të hetojë siç duhet sulmet ndaj gazetarëve, qoftë për shkak të mungesës së burimeve ose mungesës së vullnetit, thuhet në raport, ndërsa në Francë dhe Bullgari vetë oficerët e policisë sulmuan gazetarët.
/a.r
