Në një kohë kur sezoni veror thuajse ka nisur, Qendra “Konsumatori shqiptar” me mbështetjen e LëvizAlbania kanë bërë publik një raport në lidhje me gjendjen e transportit publik në një prej qyteteve kryesore turistike në vend, siç është Durrësi.
Referuar raportit voluminoz, që është produkt i një vëzhgimi rreth 1-vjeçar, shërbimi i transportit publik në qytetin bregdetar të Durrësit rezulton në një situatë kaotike. Në qytetin e dytë më të madh në vend, me 200 mijë banorë dhe me nje kampus universitar, linjat e autobuzëve nuk plotësojnë as kushtet më minimale.
Si studentët ashtu edhe punëmarrësit, ankohen se është e pamundur të mbërrijnë në kohë në destinacion referuar intervistimeve të kryera në terren. Kjo, jo për shkak të trafikut në rrugë, por si rrjedhojë e numrit të pamjaftueshëm të autobusëve si dhe mosrespektimit të orareve të përcaktuara.
Në raportin e detajuar, renditet di problem mungesa e vendeve të rezervuara për nënat e reja, gratë shtatzëna apo persona të tjerë me nevoja të vecanta. Këto gjetje u publikuan nga Qendra “Konsumatori shqiptar”, pas një monitorimi te kryer me mbështetjen e LëvizAlbania, gjatë muajve dhjetor 2016-shkurt 2017.
Higjiena është tej kushteve dhe standarteve. Që në orët e para të mëngjesit, mjetet e shërbimit publik, janë të ndotura, duke nisur nga sediljet e deri tek dyshemeja e mbushur me mbeturina. Kondicionerët nuk funksionojnë, ndërsa sipas qytetarëve faturinot sillen në mënyrë jo korrekte dhe etike në shumë raste. Ndërsa me afrimin e sezonit turistik, kur Durrësi popullohet nga afro 1 milion persona, kjo situatë bëhet edhe më alarmante.
Ndonëse sipas orareve të përcaktuara, autobusët duhet te nisen cdo 8-12 minuta, në fakt qëndrimi i tyre në stacion arrin edhe 40 minuta. Brenda mjeteve, nuk ka asnjë tabelë informuese mbi stacionet e itinerarit që përshkon mjeti, apo informacion nga faturinot për vendndodhjen.
Pjesë e vëzhgimit janë tre linja, “Durrës – Plepa, “Durrës – Currila”, si dhe “Durrës – Universiteti A.Moisiu.
Në vazhdimësi, Progres – Raportet për Shqipërinë, nga Komisioni Evropian, kanë evidentuar se transporti publik mbetet një çështje që nuk ka njohur progres. Me reformën administrativo-territoriale, pritej që shërbimi I transportit publik të përmirësohej dhe të arrinte standartet e kërkuara, por në Durrës mbetet ende joefiçent, shumë i ngadaltë dhe me mungesë të theksuar të higjienës./Konsumatori Shqiptar/Andi Malasi
