Në të gjithë Europën është e pamundur të vendosësh baste sportive për kampionatin shqiptar, pasi kompanitë europiane e kanë hequr atë si pasojë e sinjalizimeve për manipulimin e ndeshjeve. Konstatimi është bërë para zyrtarëve të Parlamentit Europian nga kompania “Federbet”, e cila merret me flukset e basteve sportive dhe krijon raporte vjetore për manipulimin e ndeshjeve. Raporti i ri për sezonin 2014-2015, i publikuar dje, vendos kampionatin shqiptar mes atyre me pullë të kuqe, ndërsa sinjalizohen edhe “bëmat” e klubeve shqiptare në arenën ndërkombëtare, ku dyshohen për manipulime si në ndeshje zyrtare, ashtu edhe në miqësore.
“Çdo javë, kompanitë e basteve europiane, heqin të gjitha ndeshjet nga kampionatet në Shqipëri, Qipro, Maltë, Mali i Zi, Bullgari, Indonezi dhe Kanada (kjo e fundit është vendi i 10 më pak i korruptuar në botë), pasi ata qartësisht reflektojnë shenja se janë të manipuluar”, shkruhej në raportin që drejtuesit e “Federbet” kanë lexuar para europarlamentarëve. Në këtë raport të edicionit futbollistik 2014-2015, kompania në fjalë nuk është ndalur në çdo kampionat, por ka zgjedhur temat më shqetësuese, ku fatkeqësisht, në vazhdimësi shfaqet emri i klubeve shqiptare.
Sipas kësaj kompanie, Europa League është aktiviteti ku regjistrohen më shumë tentativa manipulimi ndeshjesh. Në listën prej gjashtë ndeshjesh të publikuara si shembull nga “Federbet”, tre përfshijnë skuadrat shqiptare të Laçit dhe Flamurtarit. Kurbinasit, mendohet se kanë qenë protagonistë në manipulimin e rezultatit të dy ndeshjeve në favor të basteve sportive. Takimi i parë është ai kundër Rudar Velenje të Sllovenisë, të luajtur më datë 10 korrik 2014. Ndeshja përfundoi 1-1 (Laçi pësoi gol në minutën e 93), rezultat i njëjtë me atë të sfidës së parë mes dy skuadrave, ndërsa ekipi kurbinas kaloi në turin e dytë të Europa League falë gjuajtjeve nga pika e bardhë e penalltisë. Sipas “Federbet”, asgjë nuk ishte rastësore, pasi ndeshja në fjalë regjistroi kuota të larta bastesh për barazimin dhe shënimin e 2 apo më pak golave brenda 90 minutave. Laçi akuzohet për manipulim edhe të ndeshjes së turit të dytë kundër ukrainasve të Zorias, të luajtur po në Shqipëri më 17 korrik. Kurbinasit u mundën 3-0, ndërsa në këtë rast, fluksi i pazakontë i basteve ishte për shënimin e 3 apo më shumë golave në këtë sfidë. Në Europa League, në edicionin e kaluar mori pjesë edhe Flamurtari, i cili në raundin e parë arriti të fitonte 3-2 në transfertë ndaj Sioni Bolnisit. “Federbet” mendon se ndeshja e kthimit kundër ekipit gjeorgjian ishte e manipuluar, pasi rezultati përfundimtar 1-2 në favor të miqve, përshtatej me fluksin e lartë të basteve të hedhura në favor të skuadrës udhëtuese.
“Federbet” ka sqaruar se disa nga shembujt më të qartë të manipulimit të ndeshjeve ishin nëpërmjet miqësoreve që klube të ndryshme zhvillonin dhe ku ekipet shqiptare ishin përsëri protagoniste. Skënderbeu u akuzua nga ekspertë holandezë për manipulimin e miqësores së zhvilluar kundër ADO Den Hag më 8 janar, e mbyllur me humbjen 2-0 të skuadrës shqiptare. Por sipas “Federbet”, ndeshja që ka ndezur alarmet për manipulim është ajo që korçarët zhvilluan tri ditë më vonë ndaj belgëve të Ostende. Në ndeshjen e përfunduar me rezultatin 4-0 në favor të Ostende, ka pasur një fluks të madh bastesh të luajtura për fitoren e belgëve, duke falur një gol, ashtu si edhe për shënimin e 4 apo më shumë golave. Ndeshja tjetër është sinjalizuar gjerësisht nga ekspertët ndërkombëtarë si e manipuluar dhe i përket humbjes 5-0 të Laçit përballë Shtutgartit më 19 janar. Në atë ndeshje janë luajtur shuma të mëdha bastesh për shënimin e 4 apo më shumë golave./Shqip/
Dy vite sinjalizime nga “Federbet”
Kategoria Superiore
30.04.2014
Lushnja – Teuta 0-2
30.04.2014
Kastrioti – Tirana 2-3
Liga e Kampioneve
30.07.2013
Sh. Kargandi – Skënderbeu 3-0
06.08.2013
Skënderbeu – Sh. Karagandi 3-2
Europa League
04.07.2013
Teuta – Daçia 3-1
11.07.2013
Dacia – Teuta 2-0
10.07.2014
Laçi – Rudar 1-1
10.07.2014
Flamurtari – S. Bolnisi 1-2
17.07.2014
Laçi – Zoria 0-3
Miqësore
11.01.2015
Skënderbeu – Ostende 0-4
19.01.2015
Shtutgart – Laçi 5-0
