Reagime për raportin e OSBE-së të ashtuquajtur “sekret” i është bashkuar edhe Partia Republikane, dhe akuzave që i bëhen deputetit të kësaj partie Agron Duka.
Përmes një reagimi për mediat, PR e cilëson këtë raport si paçavaure, pasi sipas tyre Duka është person i ndershëm. Sipas PR, ish-deputeti i kësaj force politike që tashmë i është bashkuar LSI-së Ylli Shehu duhet të jetë personi i akuzuar .
“Qoftë ky dhe një material i brendshëm i kësaj organizate serioze, tregon papërgjegjshmëri, e cila bie në nivelin më të ulët e të turpshëm të ndonjë media të shkruar, e cila manipulon fakte për qëllime politike dhe përfitimi.
Deputeti dhe kryetari i Asamblesë Kombëtare të Partisë Republikane, z.Agron Duka, nuk ka asnjë lidhje me akuza të përdala të cituara në të ashtëquajturin “Raport”.
Ai është një njeri i ndershëm, i respektuar dhe me mbështetjen më të gjërë në qarkun e Durrësit.
Si biznesmen ka qenë i ndershëm, në respekt të ligjit dhe të shtetit. Përsa i përket lidhjeve me interesa kriminale në Shijak, Durrës e Vlorë, këto janë pjellë e mëndjeve të sëmura, të cilat kanë bërë këtë Raport, apo shpifin.
Ylli Vesel Shehu, ish- deputet i PR-së, nuk ka paguar asnjë qindarkë për t`u bërë deputet i Partisë Republikane.
Ndërkohë, akoma ky deputet rezulton se nuk ka shlyer detyrime mediatike përkundrejt subjekteve private, për fushatën e tij elektorale.
Këto, si OSBE ashtu edhe ata që i bëjnë hosana këtij raporti, mund t`i vërtetojnë në mënyrë të drejtpërdrejtë me deputetin Ylli Shehu, i cili tashmë është deputet i LSI-së.
Për sa sipër, Partia Republikane kërkon një qëndrim publik të përfaqësisë së OSBE-së, lidhur me këtë aport paçavurë, si dhe i kërkon autoriteteve shtetërore që të mbajnë qëndrim për këtë çështje”, thuhet në reagimin e PR
