Raporti i OSBE-ODIHR për 21 Qershorin, përplasen Rama dhe Basha
Raporti i OSBE-ODHIR për zgjedhjet e 21 Qershorit ka përplasur sot kryeministrin Edi Rama me liderin e opozitës, Lulzim Basha.
Ishte fillimisht kryetari i Partisë Demokratike, Lulzim Basha, ai që komentoi raportin përfundimtar të OSBE/ODIHR për zgjedhjet e 21 qershorit. Ai i ka cilësuar përfundimet e raportit si damka më e zezë e një procesi zgjedhor në Shqipëri, që prej vitit 2003.
“Raporti përfundimtar për zgjedhjet e 21 qershorit, me plot gojën është damka më e zezë që ka marrë një proces zgjedhor në Shqipëri, që prej vitit 2003. Tre janë konkluzionet kryesore të raportit. E para, më 21 qershor në Shqipëri nuk u mbajtën zgjedhje të lira e të ndershme. Togfjalëshi është zhdukur dhe nuk figuron në raport. Kjo sepse qeveria zhbëri dhe dhunoi standardet themelore të zgjedhjeve duke shënuar një rrëshqitje prapa të demokracisë shqiptare. Raporti konkludon se liria e votuesve për të hedhur votën e tyre të lirë dhe pa frikë nga ndëshkimi i qeverisë, u dhunua. Këtu është dhe konkluzioni i dytë kryesor i raportit, zhbërja e standardeve themelore të zgjedhjeve si liria e votës dhe standardet e tjera nuk erdhi as për shka të mungesës së legjislacionit, as prej mungesës së vullnetit, por për shkak të vullnetit të dyshes Rama-Meta për të mos bërë zgjedhje të lira dhe të ndershme dhe për të kapur pushtetin me çdo çmim e çdo mjet. Konkluzioni i tretë zbulon mekanizmin me anë të të cilit dyshja Rama-Meta dhunuan zgjedhjet për të kapur me çdo çmim pushtetin. Ky raport sjell prova e fakte se më 21 qershor shteti u ndesh me qytetarët dhe opozitën. Pra, jo garë mes partive, por shteti kundër qytetarëve”, tha Basha.
Kreu i PD tha se ka pasur politizim në procesin e hartimit të listave, ku akuzoi se maxhoranca “rekrutoi bandat dhe u vërsul me tërbim me mbështetjen dhe mbrojtjen e policisë”. PD, tha kreu demokrat, do të qëndrojë e vendosur me çdo forcë e mjet, për të rikthyer zgjedhjet e lira dhe të ndershme.
Pas akuzave të Bashës, Rama ka reaguar duke zgjedhur Twitterin. “Vaj medet PD flet e s’di ç’flet po kur lexon raportin e ODHIR-it ngjan tamam si të ishe Sudja duke lexuar me zë të lartë Financial Times”, shkruan Rama me ironi.
