Besim Hajdarmataj, drejtuesi i Prokurorisë së Krimeve të Rënda që ka nisur një hetim ndaj Sajmir Tahirit, është kritikuar edhe më parë nga misioni ndërkombëtar i BE-së për ligjet në Shqipëri, për mungesë thellimi në hetimet e tij.
Ditën e premte, në Komisionin e Mandateve, Hajdarmataj pranoi se kërkesa për arrestim bëhej sepse ai kishte formuar bindjen që “Tahiri ishte pjestar i grupit kriminal, nisur nga raportimet e shtypit”.
Misioni “Pameca” i Bashkimit Europian, në një raport të publikuar nga “TV Klan” para disa muajsh, fajëson Prokurorinë e Krimeve të Rënda për neglizhencë në të paktën tre raste të tjera.
Sipas tyre, ka qenë i paarsyetuar në ligj kërkesa e pezullimit që Prokuroria dërgoi për drejtorin e përgjithshëm të Policisë, Haki Çako. Njëkohësisht, ky institucion urdhëroi arrestimin e ish-kryetarit të Bashkisë së Kavajës, Elvis Roshi, pa prova të mjaftueshme për këtë.
Gjithashtu, ky raport thotë se Prokuroria e Krimeve të Rënda gaboi taktikisht, duke urdhëroi arrestimin e parakohshëm të Shullazit, gjë që vendosi në rrezik të gjithë procesin hetimor pasi ende nuk ishte grumbulluar provat e nevojshme kundër tij.
Për të gjithë këto akuza, Hajdarmataj është përgjigjur përmes një shkrese, në të cilën e konsideron si të pavlefshëm raportin e “Pameca”-s dhe akuzon misionin e Bashkimit Europian për dëmtimin e reputacionit të Prokurorisë./a.m.
