Raporti i AKM: Përmbytjet dhe thatësirat, faturë qindra milionëshe për bujqësinë shqiptare

Nga zarzavatet te drithi, bashkë me rrushin e grurin… vetëm në Shkodër e Lezhë përmbytjet kanë shkaktuar 100 milionë dollarë dëme në dekadën e fundit në të mbjella.

“Dëmi më i madh u shkaktua në veriperëndim, rajonet e Shkodrës dhe Lezhës. Bazuar në vlerësimet e bëra nga ekspertët e bujqësisë, dëmi që rezultoi nga përmbytjet në prodhimin bujqësor në këto rajone arriti në rreth 100 milionë dollarë amerikanë”, lexohet në raportin e Agjencise Kombetare te Mjedisit.

Më pak prodhim bujqësor, kufizim të mundësive për vaditje, e më tej ngricat por edhe përmbytje të papritura, që përsëriten shpesh kryesisht në dimër. Këto janë rreziqet me ta cilat po përballet ekonomia shqiptare, vetëm si rezultat i ndryshimeve klimatike, e që po shkaktojnë dëme me miliona: “Në këto kushte, duke marrë parasysh efektet e pritura të ndryshimeve klimatike në bujqësi, produkti i brendshëm bruto i Shqipërisë potencialisht do të humbasë midis 800 dhe 900 milionë dollarë amerikanë të ardhura nga prodhimi i të korrave deri në vitin 2050.”

Një tjetër shqetësim i ngritur në raport është përdorimi i lartë i pesticideve, i cili sipas Agjencisë Kombëtare të Mjedisit ka ndikuar negativisht në prodhimin bujqësor dhe cilësinë e tokës: “Pavarësisht qëllimit dhe pritjeve të Shqipërisë në lidhje me rritjen e sipërfaqes nën bujqësinë organike, pjesa e sipërfaqes totale bujqësore të përdorur për bujqësinë organike midis viteve 2012 dhe 2022 ishte e ulët. Është e nevojshme të merren masa për të arritur objektivin e politikave të BE-së që 25% e sipërfaqes bujqësore të përdoret për bujqësinë organike deri në vitin 2030”.

Sipas raportit fenomenet natyrore të viteve të fundit të shoqëruara herë me përmbytje e herë me thatësira të shumta, kanë ndikuar në uljen e rendimentit të prodhimit bujqësor.

Ndaj, duhet të merren masa vlerëson AKM, pasi në të kundërt, dëmet ekonomike mund të arrijnë deri në 1 miliard dollarë në vitet e ardhshme.