Kryeministri Edi Rama foli në podkastin “Flasim” për zhvillimet e fundit në kuadër të Paketës së Maleve, duke vënë theksin te një projekt i ri strategjik për veriun e vendit.
Rama u ndal te projekti “Porta e Alpeve”, i cili sipas kryeministrit parashikon një investim masiv prej 100 milionë eurosh, në bashkëfinancim me Bankën Europiane të Investimeve, me synim zhvillimin e mëtejshëm të turizmit malor dhe përmirësimin e infrastrukturës në zonat veriore.
Ai theksoi se projekti synon të lidhë më mirë zonat e veriut me njëra-tjetrën dhe me pjesën tjetër të vendit, përmes përmirësimit të rrugëve, transportit, ujësjellësve dhe menaxhimit të ujërave të zeza, si dhe ndërhyrjeve në zhvillimin urban dhe restaurimin e trashëgimisë historike.
Gjithashtu, sipas Ramës, një element i rëndësishëm i projektit është ruajtja e zonave natyrore të paprekura, duke garantuar zhvillim të qëndrueshëm.
“Në këto javë, në këta muaj po flitet për Paketën e Maleve, kur them po flitet kam parasysh jo vetëm çka themi ne për të informuar publikun dhe ata që dëshirojnë të investojnë kursimet e të tyre në tokën e të parëve dhe në rindërtimin e shtëpisë së gjyshërve mes maleve, por nuk është kjo përmbajtja e këtij shënimi, por është ajo që i shtohet Paketës së Maleve, si një projekt i quajtur Porta e Alpeve, që përbën një ndërhyrje të drejtpërdrejtë me një investim masiv prej 100 milionë eurosh i bashkëfinancuar me Bankën Europiane të Investimeve për zhvillimin e mëtejshëm të turizmit, me fokus turizmin malor. Është një projekt që synon të lidhë më mirë zonat e veriut me njëra-tjetrën, dhe pjesën tjetër të vendit padyshim, duke krijuar aksese të lehta dhe të qëndrueshme, përfshihet përimirësimi i infrastrukturës rrugore, transportit, investim në ujësjellës, menaxhim në ujëra të zeza, ndërhyrje në zhvillimin urban dhe restaurim të asaj trashëgimie të vyer historike që ka edhe në zonën e veriut, në ndërkohë që patjetër s’mund të ishte jashtë projektit, kujdesi për të garantuar ato pjesë të mrekullueshme të natyrës që duhet të mbeten të paprekura. Projekti ka një shtrirje gjithëterritoriale, dhe ka gjithë potencialin për t’i dhënë një nxitje ekstra turizmit dhe ekonomisë në Veriun e vendit”, tha Rama.
