Kryeministri Edi Rama i është bashkuar paraditen e sotme konferencës për 25-vjetorin e Gjykatës Kushtetuese. Në fjalën e tij, kreu i qeverisë tha se ky institucion ka krijuar besueshme në sytë e të gjithëve, duke dhënë vendime të paanshme.
“Pas një historie 50-vjeçare shkeljesh flagrante e sistemike të të drejtave të njeriut, ndryshimet demokratike sollën një ndryshim të madh. Në kuadër të këtyre ndryshimeve u krijuar edhe Gjykata Kushtetuese, një nga institucionet më të rëndësishme për garantimin e rendit kushtetues në Shqipëri. Gjatë veprimtarisë së saj që nga krijimi më 1992, Gjykata Kushtetuese është përballur me një sfidë të pazakonshme në vakumin e plotë të traditës, dhe përballë mijëra çështjesh të natyrave dhe përmbajtjeve të ndryshe, duke krijuar vit pas viti një traditë të pasur.
Vend për kritika me siguri mund të ketë, dhe ka, por nëse ka një institucion të gjyqësorit shqiptar ku sot mund të hyhet pa të ardhur turp, është pikërisht Gjykata Kushtetuese. Nisur nga fakti se në një kohë të shkurtër kjo gjykatë ka qenë e detyruar të merrej me vendime shumë të rëndësishme, e vërteta është se ky organ është përpjekur të shfaqet i paanshëm në gjykimet e dhëna, dhe i ka siguruar imazhit të vet një pamje të besueshme në sytë e të gjithëve”, tha kryeministri Rama.
Kreu i qeverisë shtoi se “drejtësia është një fjalë që të gjithë e përdorim me vend e pavend, por në veshët e gjithë shqiptarëve është një fjalë pa kuptim”, por theksoi se është i bindur për faktin se “Shqipëria do t’ia dalë mbanë” në rrugën për ta fituar drejtësinë.
I pranishëm në aktivitet ishte edhe Presidenti i Republikës, Ilir Meta, i cili nënvizoi se “vendimmarrja e Gjykatës Kushtetuese ka ndihmuar në rritjen e standardeve”.
a.ç
