Kryeministri Edi Rama ditën e sotme ndodhet në Durrës ku është ndalur edhe tek fabrika “Next Generation Perfumes”, ku Parfumet “Made in Albania” janë dëshmia se si cilësia shqiptare po depërton në tregjet evropiane.
Rama u shpreh se i vjen mirë që përballet me një realitet ku prodhohen produkte të cilësisë së lartë, si dhe ku punonjësit paguhen denjësisht.
“Më vjen mirë me çfarë dëgjova nga sipërmarësi holandez këtu për në rradhë të parë punonjësit dhe specialistët. Më vjen mirë që ky realitet nuk është thjeshtë një realitet i bukur në dukje, një realitet ku prodhohen produkte të cilësisë së lartë, por është një realitet që ato që i prodhojnë paguhen denjësisht me një pagë minimale 700 Euro dhe një pagë mesatare 900 Euro dhe prandaj kompania nuk ka probleme të gjetjes së punonjësve, por ka rradhë për të hyrë në punë këtu. Këtu respektohen ditët e pushimit dhe kështu nënat dhe vajzat kanë mundësinë që të qëndrojnë me familjet në vend që të vijnë këtu edhe të shtunë dhe të dielë dhe të harrojnë që ka një jetë përtej këtyre murreve”, shprehet Rama.
Ndër të tjera Kryeministri u ndal edhe tek investimet në zonë për të cilat tha se në vijim do të ketë projekte të tjera për jetëzimin e zonës.
“Në këto vite kemi përjetuar një transformim të të gjithë këtij territori sepse është rritur shumë kërkesa edhe falë faktit se këtu janë bërë disa ndërhyrje të domosdoshme pa të cilat do të ishte e pamundur duke filluar nga fusha kanceroze e plehrave që ishte një tmer dhe që sot nuk ekziston më, por përkundrazi sot nuk ekziston më por është kthyer në një territor të gjelbër me infrastrukturën. Do të kemi në vijim edhe projektet të tjera për jetëzimin edhe më shumë të gjithë kësaj zone, duke pasur parasysh që jo shumë larg që këtu është edhe universiteti. Do të bëjmë një investim të madh për kampusin duke iu dhënë mundësi studentëve që të kenë edhe rezidencën e tyre për të qëndruar. Do të ndërtojmë portin e ri që do ta thjeshtojë edhe më shumë gjithë tregtinë dhe shumë gjëra të tjera të mira që janë në proces”, thekson Kryeministri.
