Nga Nishi, ku po vijon punimet forumi Shqipëri-Serbi, kryeministri Edi Rama ka kujtuar një ngjarje të ndodhur dy vite më parë, pikërisht më 14 tetor, në stadiumin e Beogradit, ku luhej ndeshja mes dy kombëtareve. Teksa risolli në kujtesë momentin kur droni me flamurin e Shqipërisë së Madhe u ul mbi stadium, Rama tha se të gjithë e mbajnë mend mirë atë atmosferë. Pikërisht ky moment shënoi një ngjarje të rëndësishme për marrëdhëniet mes dy vendeve.
Por kryeministri Rama theksoi se tashmë marrëdhëniet Shqipëri-Serbi janë zhvilluar në drejtimin e duhur, duke synuar të krijohet një raport pozitiv për popujt e të dy vendeve.
Kreu i Qeverisë shqiptare theksoi rëndësinë e forcimit të bashkëpunimit në fusha të ndryshme.
“Marrëdhëniet tona janë zhvilluar në drejtimin e duhur. Nëse ne arrijmë të krijojmë një treg rajonal, do të mund t’i japim më shumë mundësi zhvillimi vendeve tona. Po kështu mund t’i kthejmë kufijtë në ura që na bashkojnë. Duhet t’i japim jetë një tregu të përbashkët. Sfida jonë më e madhe, jo të bëjmë bizneset bashkë, sepse kjo ndodh në mënyrë të ndryshme nga rrjedhat e politikës. Sfida jonë është si ta përçojmë këtë hap te administrata, që ajo të jetë në funksion të bizneseve. Duhet të sillemi me njëri-tjetrin, ashtu siç duam të sillemi nesër në hapësirën e BE. Duhet të fitojmë kohë pa hyrë ende në Union. Duhet ta kthejmë administratën ne mbështetëse dhe shërbëtore të sipërmarrjes”, u shpreh kryeministri Rama.
FORUMI I BIZNESIT SHQIPERI-SERBI
Në Nish u mbajt sot forumi biznesit Serbi – Shqipëri, me pjesëmarrjen e afro 300 sipërmarrësve, ndërsa takimin e kanë hapur kryeministri i Serbisë, Aleksandër Vuçiç, dhe ai i Shqipërisë, Edi Rama.
“Është e nevojshme t’i japim jetë një tregu të përbashkët. Të integrojmë ekonomitë dhe të tërheqim investime”, deklaroi kryeministri Rama fjalën e tij.
Ndërkohë kryeministri Serb Aleksandër Vuçiç ka vlerësuar lart shqiptarët si karakter, duke kërkuar nga biznesmenët serbë të punojnë dhe të investojnë në Shqipëri.
Ai tha se në kohën kur ekonomia është e rëndësishme, ky është patriotizëm dhe kjo është rruga e vetme që duhet ndjekur.
“Dua të inkurajoj njerëzit tanë të shkojnë në Shqipëri, të ndërtojnë objekte turistike, të krijojnë kompani të përbashkëta. Shqiptarët e mbajnë fjalën dhe janë njerëz të mirë dhe të punës. Unë jam ndoshta subjektiv, por dua t’u them se kjo është e mirë për Serbinë dhe punoni mirë me ta. I kuptojmë ndarjet politike, por duhet t’i kthehemi të ardhmes”, tha Vuçiç.
Ai u shpreh se është ndërtuar besimi i dy popujve, ndërsa tashme radhën e ka forcimi i bashkëpunimit ekonomik dhe rritja e këmbimit tregtar ndërmjet Serbisë dhe Shqipërisë.
“Është shumë e rëndësishme që të sillemi në mënyrë racionale pavarësisht nga dallimet politike. Ne kemi ndërtuar besim, pasi mendoj se te dy palët dëshirojmë miqësi. Vendet tona i lidh dëshirë për anëtarësimin në Bashkimin Europian”.
bw/d i
