Rama tregon tre arsyet pse zgjodhi Spahiun në krye të Shëndetësisë: Është besnike dhe…

Kryeministri Edi Rama ka dhënë tre arsye që, sipas tij, qëndrojnë pas zgjedhjes së Klodiana Spahiut për të drejtuar Ministrinë e Shëndetësisë dhe Mirëqenies Sociale.

I pyetur nga “Tirana Examiner” se çfarë e rekomandoi Spahiun për këtë detyrë, Rama e përmblodhi përgjigjen e tij në vetëm tre fjalë:

“E përulur, besnike, profesioniste.”

Spahiu merr drejtimin e Shëndetësisë pas dorëheqjes së Evis Salës, ndërsa profili i saj profesional e dallon nga një pjesë e paraardhësve të saj. Ajo është mjeke kardiologe dhe ka përvojë jo vetëm në politikë, por edhe brenda sistemit spitalor.

E lindur në Durrës në vitin 1973, Spahiu përfundoi studimet për Mjekësi të Përgjithshme në Universitetin e Tiranës në vitin 1997 dhe më pas u specializua në kardiologji. Ajo ka kryer gjithashtu specializime profesionale në Itali, mes të tjerash në Romë dhe Pisa.

Nga viti 2003 deri në vitin 2009, Spahiu punoi si kardiologe dhe mjeke në repartin e Mjekësisë Interne të Spitalit Rajonal të Durrësit, institucion të cilin më pas e drejtoi për një periudhë, përpara se të hynte në Kuvend në vitin 2009.

Pikërisht përvoja në një spital rajonal shihet nga “Tirana Examiner” si një nga avantazhet kryesore të ministres së re. Ajo ka qenë në kontakt të drejtpërdrejtë me mënyrën se si funksionojnë prokurimet, mirëmbajtja, furnizimet, kontratat e higjienës, diagnostikimi dhe shërbimet e specializuara në sistemin publik.

Një tjetër element i rëndësishëm në profilin e Spahiut lidhet me koncesionet e shumëdebatuara të shëndetësisë.

Në vitin 2024, si deputete socialiste, ajo ishte pjesë e komisionit hetimor parlamentar për koncesionet e sterilizimit dhe check-up-it. Gjatë punimeve të komisionit, Spahiu mbrojti qëndrimet e qeverisë dhe u përplas në disa raste me opozitën.

Kjo eksperiencë, sipas analizës së “Tirana Examiner”, bën që ministrja e re të mos mund të pretendojë se nuk i njeh dosjet dhe problematikat që lidhen me këto kontrata. Sfida tashmë është nëse njohuritë e saj mbi sistemin dhe koncesionet do të përdoren për të ndërmarrë reforma dhe kontrolluar kostot, apo për të mbrojtur mënyrën se si sistemi ka funksionuar deri tani.

Edhe fjala “besnike”, e përdorur nga Rama për ta përshkruar Spahiun, merr një rëndësi të veçantë në këtë kontekst. Një ministre që vendos të kontrollojë kontratat dhe shpenzimet e Ministrisë së Shëndetësisë, në njëfarë mënyre kontrollon edhe vendimmarrje të vetë qeverisë së saj.

Spahiu ka një karrierë të gjatë politike. Ajo është pjesë e Kuvendit që prej vitit 2009 dhe ka mbajtur së fundmi edhe postin e nënkryetares së Kuvendit.

Përvoja si mjeke, drejtimi i një spitali rajonal, njohja e dosjeve të koncesioneve dhe pesha politike brenda mazhorancës e vendosin tashmë Spahiun përballë një prove konkrete: të tregojë se ku shkojnë paratë e shëndetësisë dhe çfarë shërbimi marrin realisht qytetarët për to.