Rama tregon pse nuk u takua me asnjë zyrtar të Athinës: Raportet e mia me Mitsotakis, shumë të mira. Por mënyra sesi…!

Kryeministri i Shqipërisë, Edi Rama ka folur për raportet e qeverisë shqiptare me atë greke. Kreu i qeverisë u shpreh se marrëdhënia personale me kryeministrin e Greqisë janë shumë të mira, ndërkohë që në marrëdhënien institucionale ka një ngërç.

Sipas Ramës, ajo që i ndan me kryeministrin Mitsotakis është sesi politika greke lexon çështjen e Fredi Belerit.

“Raportet e mia me kryeministrin Mitsotakis janë shumë të mira. Në aspektin personal marrëdhëniet tona janë shumë të mira. Për sa i përket roleve institucionale, dihet që ka një ngërç dhe dihet cili është ngërçi.

Mënyra sesi politika greke e ka lexuar çështje Beleri, mënyra sesi e ka inflamuar në sytë e opinionit publik grek për konsum të brendshëm e bën të vetëdijshme atë që reflektohet në marrëdhënien mes dy qeverive.

Por ajo që dua të them është që ne ndërkohë kemi pasur një nënshtresë në këto marrëdhënie, ku gjërat kanë funksionuar dhe kanë ecur normalisht”, tha Rama në emisionin Opinion.

Kryeministri pranoi gjithashtu se pati një reagim jo të mirë nga politika greke për këtë takim, por që sipas tij, nuk kishte asnjë arsye. Ai theksoi se nuk pati takime me zyrtarë të qeverisë greke, pasi nuk e kishte kërkuar diçka të tillë.

“Nuk kishim kërkuar asnjë takim me autoritetet greke se erdhëm për këtë takim. Dhe nëse do të kërkonim takim, në mënyrën se si politike greke u pozicionua, do të ndihej në pozitë. Të jemi si të thuash të ndershëm në raport me protokollet, për një vizitën e një kryetari qeverie, merren masa të posaçme. Të jemi realist u krijua një atmosferë. Nga mënyrat ece-jake, krijoi dhe një situatë që ky takim u bë qendra e vëmendjes dhe natyrisht mund të ketë krijuar te autoritete ndjesinë për të marrë masa”, tha Rama.

Po marrëdhëniet midis kryeministrit të Shqipërisë dhe atij të Greqisë?

Për sa i përket roleve institucionale, dihet që ka një ngërç dhe dihet cili është ngërçi.

Por ajo që dua të them është që ne ndërkohë kemi pasur një nënshtresë në këto marrëdhënie, ku gjërat kanë funksionuar dhe kanë ecur normalisht.

Por ama zoti Rama, kur ju keni ardhur disa kohë më parë këtu në Athinë për të hapur ekspozitën tuaj, kryeministri Mitsotakis ishte në krahun tuaj, ministri i jashtëm ishte në krahun tuaj. E gjithë Athina ju trajtoi si një lloj “star” më shumë sesa si një kryeministrër. Ndërkohë sot quheni jo i mirëpritur. Dhe raportet të shqipërisë me Greqinë kanë pasur ulje dhe ngritje të tilla të vazhdueshme. Duket sikur ecin para dhe rikthehemi në pikën zero.

Për t’i qëndruar krahasimit të “starit”, sot mua do më mjaftoj të qënit “stari” i takimit të sotëm me emigrantët shqiptarë.