Kreu i qeverisë, Edi Rama, i pranishëm në Konispol, në vijim të takimeve elektorale, nuk la pa shigjetuar opozitën dhe Presidentin Meta.
Rama tha se ata duhet ta harrojnë që mund t’i mashtrojnë shqiptarët, ndërsa shtoi se qëllimi i tyre është pengimi i çeljes së negociatave.
“Shqiptari për politikë është kampion bote, nuk jua hedh dot shqiptarëve, sa merret një shqiptar me politikë nuk merret asnjë popull. Kështu që këta ta harrojnë se do t’ia hedhin shqiptarëve. Si mundet një parti të pretendojë të kthejë në vitin 2019 dhunën. Si mundet një opozitë dhe një President Republike t’i frynë frikës duke i kujtuar 1997. Pse këta kërkojnë me çdo kusht një konflikt? Pse organizojnë protesta të dhunshme dhe gëzohen kur shpërndahen fotot në botë, duke krijuar idenë se po bëhet nami. Po bëhet nami. E gjitha lidhet me negociata që ata duan me çdo kusht t’i bllokojnë”, tha Rama.
Kreu i qeverisë i ktheu përgjigje deklaratës së kreut të shtetit Ilir Meta, i cili disa herë në deklaratat e tij është shprehur i shqetësuar për pluralizmin në vend, si pasojë e situatës politike
“E kam dëgjuar Metën të thotë se është i shqetësuar për pluralizmin. Secili e di vetë a hy apo nuk hy për të marrë votën. Kanë marrë një vendim të gabuar, nuk i kanë bërë mirë Shqipërisë. Por do ta paguajnë shtrenjtë. Nuk ka njeri të arsyeshëm që të ka dhënë votën dhe ti ta hedhësh mandatin si leckë, pastaj të dalësh rrugëve e të fshihesh mes turmave. Pak nga pak të gjithë shqiptarët e ndershëm dhe ekstremistë demokratë që ushqehen me punë të ndershme nuk ka për t’i falur këtë pabesi, të braktisësh ata që të ka dhënë votë. Kjo është pjesë e një plani ogurzi që tërheq vëmendjen që shkakton ndjenja negative në sytë e miqve por edhe atyre që nuk na e duan të mirën”, tha Rama.
g.kosovari
