Kryeministri Edi Rama ka përsëritur kërkesën ndaj të rinjve që të mos paguajnë mijëra paund për t’u larguar drejt Anglisë, por t’i investojnë ato në agroturizëm.
Gjatë fjalës së tij në bilancin e sezonit turistik veror, Rama tha se të gjithë ata që duan të investojnë në agroturizëm do të kenë mbështetjen e qeverisë.
“Investimet që po bëhen na e mundësojnë këtë ambicie. Kemi rritje të lrmisë së vendeve të punës për shumë më tepër vende pune të specializuar dhe patjetër rritje të pagave. Aeroporti i Vlorës po ecën me ritme dhe është i garantuar nga marrëveshje me operatorin e Mynihut. Dhe kjo nuk është pak gjë. Është shumëçka. Aeroporti i Sarandës do të jetë në kantier gjatë këtij mandati. Ai i Kukësit ka hapur një perspektivë të re dhe ne po vijojmë me investime të rëndësishme në zonën e Kukësit, përsa i përket turizmit. Dhe është kollaj të qeshësh, shumë më kollaj të përqeshësh. Akoma më kollaj të manipulosh e të helmosh, por unë e përsëris, sado që përsëri mund të përqeshem e mund të përdoret për të manipuluar se të gjithë ata që paguajnë nga 30 mijë paund për të marrë rrugët e frikshme të emigracioni klandestinë në duart e trafikantëve, në kërkim të një parajse që nuk kanë për ta gjetur në Angli. Me ato 30 mijë paund mund të bëjnë ekonominë e tyre atje në Kukës. Dhe këtë nuk e them bazuar në atë që kam parë në një ëndërr me sy mbyllur, por bazuar në realitet. Të shkojnë e të pyesin. Të gjithë ata që duan të bëjnë agroturizëm në Kukës, qeveria do t’i mbështesë. Do të fitoni më shumë se ç’fitoni nga punët në Angli, të bardha apo të zeza. Agroturizmi po jep rezultat shumë të mirë kudo. Është një para e pastër, një para e sigurtë”, tha kryeministri.
/a.r
