Kreu i qeverisë, i shoqëruar nga ministri i Ilir Beqaj, inauguroi sot poliklinikën Nr.10 të kryeqytetit ku u inspektua nga afër zbatimi i check-up në kabinetet e kësaj qendre.
Gjatë një takimi me mjekës dhe pacientët, u vu re se shumica e tyre kishin ardhur për herë të dytë, ndërsa doktoresha Rudina Gjini bëri të ditur se interesi i qytetarëve është në rritje sa i përket kontrollit që u ofrohet falas.
Nga ana tjetër, Rama tha se nëpërmjet check-up, po krijohet për herë të parë një bazë të dhenash shumë të rëndësishme për të vijuar punën në sistemin e shëndetësisë.
“Ne jemi shteti i vetëm në rajon dhe në Europë që nuk kemi një kartelë shëndetësore të popullatës dhe duke mos patur të tilla, nuk dimë se cila është situata e përgjithshme dhe kush janë sëmundjet më problematike, çfarë duhet të bëjmë me politikat më tej, etj. Kjo është vendosja e një bazë të dhënash për herë të parë, pas 20 e kusur vitesh, se para 20 e kusur vitesh edhe lopët, edhe delet kishin kartelën e tyre. Kurse këtu gjithçka u zhduk. Do të ishte mirë ta bënim për të gjithë popullsinë, por jemi fokusuar tek grupmosha 40-65 vjeç sepse aty shfaqen zakonisht problemet e fillesave me sëmundjet” – tha Rama.
Qendra shëndetësore nr.10, është qendra më e madhe në Tiranë që mbulon një zonë prej rreth 80 mijë banorësh, të njësive bashkiake 3 dhe 4, në kryeqytet, nga të cilët 20 mijë janë të grupmoshës 40-65 vjeç. Mësohet se personeli prej 114 mjekësh, shërben gjatë gjithë ditës, me dy turne. Kontrolli bazë shëndetësor përfshin vlerësimin e riskut shëndetësor për 7 çështje të rëndësishme të shëndetit të çdo qytetari.
