Kryeministri Edi Rama ka reaguar pas publikimit të një lajmi nga Zëri i Amerikës lidhur me blerjen e votave në Shqipëri gjatë zgjedhjeve të vitit 2017.
Kryeministri Edi Rama u tregua i ashpër me VOA-n, duke e akuzuar se për herë të dytë brenda pak ditësh, kjo media u bë kazan i Tiranës.
Kreu i qeverisë tha se me Shtëpinë e Bardhë flet në mënyrë të drejpërdrejte dhe se sot po pret një komunikim.
“Qysh prej ditës së djeshme, edhe sot, ka mbirë në gjuhën e miqve tanë vulëhumbur shprehja: E tha Zëri i Amerikës. Domethënë e tha Amerika…
Fatkeqësisht është e dyta herë që VOA bëhet zëdhënës i kazanit të Tiranës. Herën e parë ne e dëmonstruam me qindra faqe të dokumentuara të gjithë gënjeshtrën e lajmit të dhënë mbi rekrutimet e punonjësve.
Ndërsa këtë herë, asgjë e re nga fronti juaj. Një sallatë fjalësh e cila nuk ka asnjë shans të çorodisë asnjë shqiptar. Me Amerikën, kjo qeveri dhe unë personalisht, komunikojmë drejtpërdrejtë.
Pas këtij fjalimi jam i detyruar t’ju lë se jam në pritje të një komunikimi të drejtpërdrejtë me Shtëpinë e Bardhë” – tha Rama në Kuvend.
Ndërkohë shefi i ekzekutivit iu drejtua ish-kryeministrit Berisha, pas akuzave të këtij të fundit.
“Unë me Amerikën kam marrëdhëniet më të mira, ti Sali hajde dhe përgjigju: A e kalon dot oqeanin? Atyre tropojanëve të tu u firmose 15 HEC-e dhe ne anuluam 13 prej tyre” – u shpreh Rama.
/javanews/a.rada
