Nga Namir Lapardhaja
Duke qenë se kishin bërë plane, kishin organizuar takime, kishin harxhuar orë të tëra duke e menduar dhe pleqëruar se si do të çanin rrethimin e gardës pasditen e sotme, Rama ua fiku llampën e shpresës dhe i lejoi të futen në seancë.
Duke qenë se kishin menduar se përplasja do t’u jepte pikë, se do të polarizonte opinionin në pro dhe kundër, se, duke u shtyrë dhe përplasur me gardistët dhe karriget e Kuvendit, do të shfaqeshin si triumfatorë, do t’i hidhnin benzinë zjarrit të fikur të “Revolucionit”, Rama i futi brenda, për t’u treguar shqiptarëve se kush janë “alternativa” e tij.
Duke qenë se nuk kanë asnjë qëndrim politik, nuk kanë asnjë ligjërim alternativë, nuk përbëjnë më asnjë lloj kureshtjeje dhe habie në ato që bëjnë dhe thonë, Rama urdhëroi të shkelen rregullat e Kuvendit dhe të përjashtuarit të mos rrinë te dera, por të futen brenda dhe të hipin mbi karrige.
Duke qenë se “Revolucioni” nuk tremb më askënd përveç vetvetes, Rama si mjeshtër i gallatës dhe i humorit që është, e shuan atë me pështymë.
