Kryeministri Edi Rama ka zhvlerësuar sot ambiciet e Presidentit Bujar Nishani për një mandat të dytë si President i vendit. Sipas kreut të qeverisë Presidentin do ta vendosi aleanca për Shqipërinë Europiane dhe kjo ska asnjë lidhje me deklaratat e një individi.
Presidenti Nishani disa herë me rradhë ka shfaqur ambicien për një mandat të dytë si President. Raportet e tij me mazhorancën thuajse kanë qenë armiqësore, pasi qëndrimet e kreut të shtetit më shumë kanë qenë në vijën politike të PD-së, duke qenë Presidenti me profilin më politik në Presidencë. Kjo ka bërë që mes mazhorancës dhe kreut të shtetit të ketë një ftohje të madhe, gjë që nuk krijon asnjë shans që Nishani të ketë një hapësirë sado të vogël për një mandat të dytë si President. Të paktën ai nuk do të kandidohet nga mazhoranca.
Dekriminalizimi, Rama shigjeton Bashen
Rama komentoi edhe vendimin e djeshëm të KQZ-së për t’i hequr mandatin dy deputetëve Shkëlqim Selami dhe Dashamir Tahiri si dhe kryebashkiakut të Kavajës, Elvis Rroshi, duke e quajtur këtë një vendim të drejtë dhe shembull kuptimplotë të funksionimit të ligjit, kryeministri thumboi edhe kryeopozitarin Basha.
“Në dijeninë time jam kryetari i parë i një partie politike që kur kam bërë listën e deputetëve të sjellin dëshminë e penalitetit dhe në vitin 2013 ishte i vemti dokument zyrtar për të provuar dëshmi. “Virgjëreshat” që më tregojnë mua imoralitetin me këtë aspekt i shpreh përçmimin më të madh, pa vënë në diskutim shkallën e virgjërisë së tyre. Ligjin e kemi votuar pa rezervë. Nuk mendoj që është e ndershme, etike, demokratike që të sulmosh njerëz si në kohën e qëmotit, ndërkohë që njerëzit duhet të përgjigjen përpara ligjit. Ligji duhej sipas PD se sipas tyre 19 deputetë të PS ishin kriminelë. Kjo është e rëndë. S’mund t’i thotë tjetrit kriminel pasi ka paguar dënimin”,- tha Rama.
Ndër të tjera, kryeministri ftoi Bashën t’i tregonte 19 kriminelët brenda PS. “Në politikë po flasim për ligjin që vendos kufizime në lidhje me kandidueshmërinë. T’i thuash tjetrit kriminel për të shkuarën e tyre që ose janë dënuar ose s’janë dënuar hiç, kjo është kriminale. Ku janë 19 deputetët me rekorde kriminale në PS? Ashtu siç unë nuk mund të bëj kriminel deputetin e PD që humbi mandatin për shkak të ligjit. Por s’mund t’i them kriminel”.
Me. Ar
