Seanca parlamentare ka nisur me debate midis kryeministrit Edi Rama dhe kryetarit të grupit parlamentar të Partisë Demokratike, Edi Paloka.
“Vjen e tallesh këtu pasi tallesh fshatrave, jo jam me Partizanin, jo për gruan në shtëpi”, i tha Paloka.
“Unë jam me Partizanin jo me Ballin Kombëtar dhe kjo nuk është as sekret dhe as arsye për të ardhur këtu në emër të Ballit Kombëtar e të bësh fitimtarin. Se në emër të Ballit Kombëtar vini e numëroni sa pula keni shqyer kur ishit në qeveri. E mirë bëni se vetëm atë dini të bëni e keni bërë dhe sot ketu jeni si pasardhës të lavdishëm të renegatëve e tradhtarëve”, u përgjigj Rama.
Kryeministri i bëri gjithashtu thirrje opozitëz që të jepte ndonjë ide zgjidhjeje për probleme e bujqësisë, në vend të kritikave.
Ai u është përgjigjur edhe akuzave të opozitës për politizim të Universitetit Bujqësor.
“Do të ishte mirë që Universiteti Bujqësor të mos ishte kthyer në një rrënojë politike për shkak të urrejtjes. Për ju ishte vetëm hapësira e lëmoshave, ndërsa për ne është hapësira e një zhvillimi që nuk bazohet tek lëmosha, por tek investimet e bazuara në logjikën e tregut”, ka deklaruar Rama.
Rama ka thënë se, ndryshe nga PD, që ndër vite e ktheu universitetin në një ndërmarrje të interesave të saj, qeveria e tij synon ta ringrejë atë.
“Ne jemi angazhuar në një bashkëpunim konkret me Universitetin Bujqësor, me rektorin e tij, për ta rikthyer në krye të detyrës dhe të jetë një vend ku zhvillohet praktika e standardeve europiane e ku referohet çdo sipërmarrës e fermer për të rritur cilësinë e prodhimit të tij”, ka thënë Rama.
Kreu i qeverisë ka hedhur po ashtu poshtë akuzat e opozitës për rrënimin e sektorit të bujqësisë, duke thënë se kur pikërisht në kohën kur PD ishte në pushtet, ky sektor u shkatërrua nga ndërtimet “kuturu” dhe mungesën e investimeve për kanalet ujitëse e kullosëse.
“Vini këtu dhe kërkoni llogari në hava. Jeni ju shkatërruesit e shtetit në çdo sektor. Kur vini këtu mundohuni që përveç kritikave të jepni edhe ndonjë ide”, ka vijuar Rama, i cili u është përgjigjur edhe akuzave për kanabisin.
“Sa për kanabisin, mos u shqetësoni se nuk është ashtu siç thoni ju. Referojuni shifrave të eksporteve bujqësore, që janë më të lartat ndonjëherë”, ka shtuar Rama.
