Në konferencën “Sfidat e Emigracionit” të mbajtur mëngjesin e sotëm në Pallatin e Kongreseve, Kryeministri Edi Rama ka deklaruar se ka rënë numri i shqiptarëve që largohen nga vendi.
Kreu i qeverisë solli shembullin e Kroacisë, për të treguar se emigracioni është një fenomen edhe i vendeve më të reja të Bashkimit Europian.
Sipas Kryeministrit, në vitin 2017 nga Kroacia janë larguar 50 mijë qytetarë, ndërsa nga vendi ynë kjo shifër është më e ulët për të njëjtin vit, 39 mijë.
“Shqiptarët nuk largohen për azil politik, por janë të njëjtat arsye që largohen edhe polakët, rumunët apo kroatët. Mbi 50 mijë persona u larguan vitin e kaluar nga Kroacia që është vend i BE, por ata nuk quhen si azilkërkues, por forcë e lirë punë. Nëse nga Kroacia u larguan 50 mijë persona, nga Shqipëria janë larguar vitin e kaluar vetëm 39 mijë vetë, pavarësisht propagandës. Në Italinë e Jugut, fenomeni i largimeve është kronik tashmë”, deklaroi Rama
Kryeministri deklaroi se ka një rënie drastike të azilkërkuesve shqiptarë
“Në 2017, në krahasim me 2013 kemi 20% më pak emigracion, ndërsa në krahasim me 2011, numri i emigrantëve ka rënë me mbi 30%. Kërkesa për një jetë më të mirë mbetet gjithmonë një arsye për të emigruar. Emigrimi shihet vetëm si mundësi punësimi. 84% e emigrantëve, e lidhin me mundësinë për punësim, lëvizjen e tyre drejt vendeve të tjera”, deklaroi Rama
“Bonus mujor mbi rrogën, 2 mln lekë për mjekët që shkojnë në rrethe”, tha kryeministri
Ndersa, Ambasadorja e Gjermanisë në vendin tonë Susanne Schütz paralajmëroi se do të kthehen edhe me forcë nëse do jetë e nevojshme të gjithë ata që kërkojnë azil në Gjermani. Në konferencën “Sfidat e emigracionit”, Susanne Schütz u shpreh se Shqipëria është një vend kandidat i BE dhe jo një vend me persekutim politik.
“Shqipëria është një vend kandidat i BE dhe nuk është një vend me persekutim politik, që ishte një nga arsyet për të dhënë azil dhe do të kthehen në Shqipëri edhe nëse duhet me forcë dhe do të ndalohen të hyjnë në Gjermani deri në 5 vjet”, tha Schütz
Pavarësisht këtyre politikave të ndjekura, ambasadorja gjermane tha se për shqiptarët e kualifikuar ka mundësi të tjera, duke aplikuar për vizë pune.
“Pavarësisht këtyre politikave tregu është i hapur për ata punëtorë të kualifikuar, nëse ata plotësojnë kushtet kanë mundësi të aplikojnë për viza punë dhe 3 mijë shqiptarë kanë përfituar në 2017 nga kjo”, tha Schütz
a.ç
