Kryeministri i vendit, njëkohësisht kryetari i Partisë Socialiste Edi Rama ka vijuar takimet në bazë në kuadër të zgjedhjes së strukturave në bazë dhe anëtarësimeve të reja.
Gjatë fjalës së mbajtur, Rama i’u përgjigj akuzave të opozitës për abuzime dhe korrupsion në sektorin e shëndetësisë.
“Shërbimi te mjeku i familjes është falas. Reforma në shëndetësi ka ulur çmin e ilaçeve me 30%. Kjo rezultat i qeverisjes së Partisë Socialiste. Sot kemi zgjeruar listën e ilaçeve të rimbursueshme, duke kursyer 70 milion dollarë, që qytetarët i kanë në xhepat e tyre jo më për të blerë ilaçe”, tha Rama.
Më tej ai u shpreh i vendosur se Qeveria e tij nuk do të tërhiqet nga reformat pavarësisht kostove politike. Sipas Ramës, Partia Socialiste ka treguar se është e vetmja forcë që mund të bëjë shtet.
“Nuk kemi kohë për të humbur, dhe nuk ngurojmë për çuarjen para të reformave, dhe t’i trembemi kostos së tyre. Pasi Shqipëria nëse do t’i kishte ndërmarrë këto reforma 15, 10 apo 5 vite më parë sot do të flisnim për gjëra të tjera. Kemi arritur në pikën ku duhet të themi që jemi në drejtimin e duhur dhe në çdo aspekt po avancojmë, diku me shpëjt dhe diku më ngadalë. Diku me rezultate që janë të prekshme dhe diku ende jo. Nuk ka dyshim që PS edhe njëherë tjetër në historinë e këtyre të 20 e kusur viteve po tregon se është fuqia e vetme që mund të bëjë shtet në këtë vend. Ndaj i uroj mirëseardhjen vajzave dhe djemve që i janë bashkuar Partisë Socialiste”, tha më tej Rama.
Në takimin me socialistët e qarkut të Beratit, Rama deklaroi se procesi i hapjes së partisë, i shërben përafrimit të saj me shoqërinë shqiptare. Rama u ndal edhe tek disa probleme të hasura te organizatat socialiste që sipas tij po marrin zgjidhje gjatë këtij procesi.
“Hapja e partisë nuk është qëllim në vetvete, por shtysë për të përafruar sa më shumë partinë me shoqërinë, dhe për ta bërë një pasqyrë të shoqërisë. Një shoqërie të larmishme dhe jo njësoj në çdo komunitet. Në këtë proces kemi parë edhe shumë probleme të trashëguara të cilat i kemi futur në rrugën e zgjidhjes. Problemin e organizatave me fiktivitet, problemin e organizatave te një familje apo një fis, poblemin e organizatave të marra peng vite e vite të tëra në emër të së kaluarës, probleme të organizatave që nuk reflektojnë politikën tonë të qartë të barazisë gjinore. Organizata pa gra, organizata pa vajza nuk mund të jenë të Partisë Socialiste”, tha Rama.
