Kryeministri Edi Rama ishte i pranishëm në një takim me mjekët ku ai foli rreth reformimit të sistemit të shëndetësisë. Ai deklaroi para bluzave të bardha se kjo reformë, kërkon kohë për implementim, ashtu si dhe reforma në arsim.
Ai deklaroi se të jesh mjek, mësues, apo polic në vendin tonë është një punë e vështirë.
“Të jesh mjek dhe mësues apo punonjës i policisë në këtë vend është vërtetë shumë e vështirë, apsi mbart me veten, mbi vete një kosto morale të krijuar në shumë vite. E cila është jashtëzakonisht e vështirë që të shlyet shumë shpejt. Në tërësi reformat japin rezultate me vonese në krahasim me nevojën. Reformat në Shëndetësi kërkojnë kohë të gjatë. Më ka bërë shumë përshtypje dhe jam interesuar për këtë gjë një Gjerorgji se perceptimi më pak pozitiv ishte për shëndetësinë. Kur vjen puna te shëndetësia mosbesimi ka një hark kohor shumë herë më të gjatë sesa në sektorët e tjerë. Kur vjen puna tek shëndetësia nuk është thjesht çështja tek një shërbim publik, por tek raporti që ka të bëjë me jetën. Ne e gjetëm sektorit në një situatë alarmante dhe unë nuk dua të bëj shumë krahasime por dua të krahasoj vetëm gjendjen e 3 spitaleve të Tiranës; QSUT, Sanatoriumin, dhe Spitalin e Traumës.”, tha Rama.
Më tej Rama tha se mjekët duhet të kenë rrogat më të larta.
“Duhet të kenë rrogën më të lartë në Republikën e Shqipërisë. Edhe më të lartë se shkëlqesia e tij, Presidentit të Republikës që jeton në Tiranë, punon në Tiranë dhe radhë del jashtë Tirane”, tha Rama.
Kreu i qeverisë ironizoi edhe ish-Kryeministrin Sali Berisha në lidhje me rritjen e pagave.
“Është e vërtetë që ne në tre vite nuk kemi bërë asnjë rritje rroge nominale, por në raport me ato që merrnit pas heqjes së taksës së sheshtë keni marrë më shumë. Rroga e infermierëve është rritur ndjeshëm se hoqëm 10%. Po të bëjmë një krahasim të thjeshtë, se dëgjova kolegun tuaj, mjekun që i është përkushtuar politikës, i cili pretendonte se ka pasur 160% rritje të rrogave të mjekëve dhe infermierëve. Natyrisht ne e dimë që ai punon me një zero më shumë gjithmonë, por edhe duke e ulur nga 160% në 16% prap nuk del hesapi”, tha Rama.
/a.m.
