Kryeministri Edi Rama ka reaguar ashpër për lejen e dhënë nga zyrtarët vendorë që kishin dhënë leje për karburantin që ishte ndërtuar në anë të autostradës Lushnje-Fier.
Në një takim me kryebashkiakët, Kryeministri Edi Rama tha se të gjithë zyrtarët e Bashkisë së Lushnjes që kishin firmosur për atë leje, do të shkojnë për ndjekje penale në Prokurori.
“Kur vjen puna për të dhënë leje të paligjshme për karburante, hyni dhe te rrugët kombëtare, por kur vjen puna për të pastruar rrugët kombëtare aty nuk hyni. Për atë karburant të prishur dje do shkojnë në Prokurori të gjithë ata që kanë firmosur në Bashkunë e Lushnjes. Bashkitë nuk japin leje për rrugët kombëtare. Në shkelje të plotë të atij ligji që është shkelur me 4 këmbët që thotë 20 metra nga aksi i rrugës kombëtare nuk mund të zhvillohet asgjë”, deklaroi Kryeministri Rama.
Karburanti në fjalë u shemb dje nga forcat e IKMT si ndërtim pa leje dhe u paralajmërua ndjekje penale.
/a.r
