Rama publikon një video: Kujt i shërben lufta ndaj informalitetit

Rama: Ja kujt i shërben lufta kundër informalitetit

Kryeministri Rama ka zhvilluar vizita në disa biznese në Lezhë, në kuadër të takimeve për aksionin kundër informalitetit. Në një postim të tijin në “Facebook”, Rama shkruan se aksioni i nisur është një proces historik, i cili mbron konsumatorin dhe e bën qeverinë partner të biznesit të ndershëm.

Rama ka postuar në profilin e tij një video nga takimet me pronarët e bizneseve të vogla, të cilët shprehen të kënaqur me aksionin, i cili sipas tyre po i bën të gjithë njëlloj.

Në videon e postuar nga kreu i qeverisë, në një moment Rama shfaqet teksa hyn në një dyqan, ndërkohë që aty grupi i tatimorëve po ushtron kontrollin e dokumentacionit. Pasi komunikon me shitësen, Rama shton: “Në qoftë se këta sillen mirë, falënderojini. Nëse nuk sillen mirë, më lajmëroni”.

Postimi i Ramës në “Facebook”

JA KUJT I SHËRBEN LUFTA KUNDËR INFORMALITETIT

Le ta shohë këtë video shumë të shkurtër kushdo që gabimisht e mendon operacionin kundër informalitetit një luftë me biznesin e vogël!

E kundërta është e vërtetë, kjo është një luftë me hajdutërinë e kthyer në sistem nga politika e vjetër; me anarkinë e ushqyer njëzet e kusur vjet nga keqqeverisja që na pengoi të bëhemi shtet; me varfërinë e aspiratave të një pushteti që në tetë vitet para 23 qershorit 2013 e rrënoi besimin e njerëzve tek institucionet dhe e ktheu shtetin në një shërbëtor të familjes në pushtet.

Kjo është një luftë që mbron konsumatorin dhe e bën qeverinë partnerin e vendosur të biznesit të ndershëm. Asgjë nuk e ndalon këtë proces historik!

Redaksia Java News/ f.g