Aktorja dhe këngëtarja e njohur Elia Zaharia është një tjetër zë pro-ndërtimit të një godine të re për Teatrin Kombëtar.
Kryeministri Rama publikoi në faqen e tij në ‘’Facebook’’ qëndrimin e bashkëshortes së Princit Leka Zogu të Dytë, e cila shton se ‘’në pamundësi të rikonstruksionit të godinës aktuale dhe ndërtimit të një teatri të ri duhet që godina aktuale të shembet, pasi nuk ofron më asnjë kusht të përshtatshëm për t’u dhënë shfaqje’’.
Postimi i kryeministrit Rama
Elia Zaharia, vajza e aktores së madhe Yllka Mujo, është edhe ajo një aktore e talentuar e teatrit, që njësoj si shumica dërrmuese e komunitetit teatror, ka opinionin e arsyeshëm lidhur me të ardhmen e godinës së Teatrit Kombëtar
ELIA ZAHARIA:
Nuk mendoj se është mëkat të kërkosh parametra dhe kapacitete europiane për një teatër dinjitoz kombëtar. Nëse do qe e mundur të ndërtohet ky teatër i ri modern, dhe krahas tij të restaurohet apo rikonstruktohet ai ekzistues, kjo do të ishte një zgjidhje ideale dhe ne të gjithë do të ishim shumë të lumtur! Por sa reale është në kushtet e sotme kjo dëshirë e jona? A i përmbush godina e sotme këto parametra? Këtë përgjigje ata që e njohin sadopak teatrin në brendi e dinë. Ata që e kanë parë vetëm nga fasada apo në televizor, i ftoj ta vizitojnë. Për një gjë i siguroj të gjithë ata që i kanë ndarë me dashje artistët në “me ne ose kundra nesh” – nuk ka asnjë artist që nuk e do apo nuk i dhëmb Teatri Kombëtar, përkundrazi! Të gjithë jemi teatri!
