Kryeministri Edi Rama ka publikuar deklaratën e përbashkët të përfaqësueses së Lartë të BE e njëkohësisht zëvendëspresidente e KE, Federica Mogherini dhe e komisionerit Johannes Hahn mbi zhvillimet e fundit në Shqipëri.
Rama thotë se Mogherini dhe Hahn, që përfaqësojnë edhe dy familjet e mëdha europiane, të së majtës e të së djathtës – ku bën pjesë edhe PD – me deklaratën e tyre tregojnë se kush gënjen, ai apo Basha.
Postimi i Ramës:
KUSH GËNJEN (16)
Deklaratë e përbashkët e Përfaqësueses së Lartë të BE e njëkohësisht zëvendëspresidente e KE, Federica Mogherini dhe e Komisionerit Johannes Hahn mbi zhvillimet e fundit në Shqipëri (Vlen të nënvizohet se Mogherini dhe Hahn përfaqësojnë edhe dy familjet e mëdha europiane, të së majtës e të së djathtës – ku bën pjesë edhe PD – që ndërtuan Europën e Bashkuar e luftojnë për progresin e saj):
“Na vjen keq për bojkotin parlamentar në Shqipëri dhe që opozita nuk është regjistruar ende për të marrë pjesë në zgjedhje. Debati politik nuk duhet të bëhet jashtë, por brenda parlamentit sipas praktikës demokratike. Qytetarët meritojnë udhëheqje të përgjegjshme.
Ne u bëjmë thirrje, edhe një herë, të gjithë liderëve politikë që të veprojnë me përgjegjësi, me respekt për institucionet, dhe të hapin rrugën për zgjedhje demokratike, në përputhje me standardet ndërkombëtare.
Më konkretisht, reforma aq shumë e nevojshme e drejtësisë në Shqipëri, është vënë përsëri nën sulm.
Ne u bëjmë thirrje të gjitha palëve që të përfundojnë formimin e institucioneve të vetting-ut. Sulmimi i reformës së gjyqësorit në vend që të sigurohet zbatimi i vetting-ut, me monitorimin e ngushtë të Operacionit Monitorues Ndërkombëtar, dëmton të tashmen dhe të ardhmen e Shqipërisë.
Ne presim që anëtarët e Parlamentit të tregojnë përgjegjësi, zotësi për të vepruar brenda kornizës demokratike legjitime institucionale, dhe se ata qëndrojnë nga ana e popullit të Shqipërisë, që vazhdon të kërkojë nisjen e zbatimit të vetting-ut dhe një gjyqësor përfundimisht të reformuar, edhe si një hap vendimtar për hyrjen e vendit në Bashkimin Evropian”, thuhet në deklaratën e tyre, të lëshuar një ditë më parë.
