Kryeministri Edi Rama deklaroi sot në kuvend se protesta e studentëve i dha një shuplakë qeverisë, grusht opozitës dhe shpresë Shqipërisë
Ndërkohë që studentët protestojnë para parlamentit, Rama ripërsëriti ftesën për dialog.
Rama tha se qeveria e ka zgjidhjen për studentët, por finalizimi i saj bëhet vetëm me dialog
“Adashi im në mbiemër, Rama Luan, tha se studentët duhet të na nxjerrin jashtë, por juve ju kanë nxjerrur jashtë me kohë. Dje janë formuar organet e drejtësisë së re, KLGJ dhe KLP. Propozimet e opozitës janë të refuzuara. Janë propozime për të mos u bërë kurrë. Protesta i dha një shuplakë qeverisë, një grusht opozitës dhe një shpresë shoqërisë. Shoqëria kërkon zgjidhje, por ajo nuk vjen nga doktoresha Kryemadhi, profesor Lulzimi, apo profesor Qorri. Opozita kërkon vetëm bllokim zgjidhjesh. Qeveria zgjidhjen e ka por do e jape me dialog“, deklaroi Kryeministri Rama
“Të tetë pikat janë të realizueshmë dhe ne jëmi gati t’i realizojmë. E thashë unë tani, tani shikoni vazhdimin, plotëso pikat, ne nuk takohemi. Po si bëhet plotësimi i pikavem në çfarë forme? Qeveria nuk është në konflikt me studentët, por sy e veshë krah studentëve. Por që të ketë zgjidhje reale duhet që një grup pune të ndjekë hap pas hapi zbatimin për zgjidhjen e pikave, por kujt t’ja themi? Duhet ta flasim me studentët ku të dalë një marrëveshje e kalendarizuar dhe të ketë përgjegjës për çdo pikë, ku përgjegjësi jep llogari. E kjo arrihet me dialog, sepse këto zgjidhje duhet të kenë përgjegjës. Të plotësohet çdo pikë patjetër, të plotësohet çdo kërkesë patjetër. Po pastaj? Tarifat, kaloriferët, bibliotekat nuk e zgjidhin problemin e universitetit. As qeveria vetëm jo. As rektorët e dekanët, por të gjithë bashkë.”, theksoi Rama.
Kreu i qeverisë mësohet se ka ngritur një grup pune për përgatitjen e dokumenteve në lidhje me kërkesat e studentëve, por insistoi se duhet dialog.
Gjithashtu, dje qeveria miratoi marrëveshjen 3 milionë euro me qeverinë gjermane për rikonstruksionin e konvikteve të studentëve në Tiranë.
Protesta e studentëve riktheu sot në parlament edhe 8 deputetë të opozitës, të cilët shpëtuan edhe djegien e mandateve.
4 deputetë të PD dhe 4 deputetë të LSI ndodhen në seancën plenare sot në Kuvend duke thyer kështu bojkotin pas 5 muajsh. Nga deputetët e PD në seancën e sotme marrin pjesë Luçiano Boçi, Valentina Duka, (dy pedagoge) Izmira Ulqinaku dhe Ervin Salianji. Ndërsa nga LSI, Floida Kërpaçi, Luan Rama, Petrit Vasili dhe Kejdi Mehmetaj.
Kërkesat e studentëve
1. Rritja e buxhetit në 5% e GDB me qëllim mundësimin e përgjysmimit të tarifës së studimit për cdo nivel studimi, përmirësim e mësimdhënies dhe infrastrukturës (universitete dhe konvikte).
2.Transparence me buxhetin nga ministria e Arsimit dhe IAL-ve, publikimi të gjitha shpenzimeve online
3.Rritja nga 10% në 50% e peshës totale të votës së studentëve për të zgjedhur kandidatët për dekanë, rektorë dhe cdo fakultet të ketë një përfaqësues të studentëve në senatin akademik.
4. Rishikimi i titujve akademikë dhe verifikimi i plagjiaturave të doktoraturave dhe teksteve mësimore.
5.Mbështetur në nenin 99 mbi Këshillat Studentore, ligji i arsimit të lartë, pika 2 kërkojmë që bordi i administrimit të IAL-eve të ketë numër të barabartë votash si nga MAS dhe IAL-t si edhe të shtohet një përfaqësues në këtë bord nga studentët.
6.Pajisja e të gjithë studentëve me kartën e studentit brenda vitit akademik 2018-19
7.Ndërtimi i bibliotekave me starndarde europiane dhe me libër universitar online, falas për studentët në gjuhën shqipe.
8.Vlerësimi i performancës në mësimdhënie dhe kërkim shkencor i pedagogut, publikimi i tij online dhe regjistrimi i leksioneve.
Javanews/a.çupaj
