“Tirana Training Center”, një qendër për inovative për industrinë kreative në Shqipëri, u prezantua këtë të martë (28 janar) nga kryeministri Edi Rama dhe ministri i Ekonomisë, Kulturës dhe Novacionit, Blendi Gonxhe.
Kjo qendër është vendosur pranë ish-Kinostudios “Shqipëria e Re”, ndërsa gjatë prezantimit, kryeministri Rama e cilësoi si një nga programet më transformuese për industrinë kreative në Shqipëri.
“Moment i veçantë pasi rikthehemi këtu në këtë hapësirë pas një punë të mundimshme për restaurimin e saj për të hapur një program inkurajues dh e frymëzues, duke krijuar mundësi të reja për të gjithë të rinjtë e Shqipërisë kreative. Shqipëria sot ka kaluar në një fazë ku, ndryshe nga disa vite më parë kur shprehja më e natyrshme e realitetit ishte se këtu nuk bëhet asgjë, në shprehjen çdo gjë këtu është e mundur. Dhe sot në Shqipëri çdo gjë është e mundur. Para disa ditësh patëm një diskutim me një sërë protagonistësh të kësaj hapësire që përfaqësojnë në nivele të ndryshme, por deri në nivelet më të larta industrinë kreative të SHBA dhe besoj që është një motiv për t’u mbushur me më shumë besim dhe për të pasur bindjen se të gjitha gjërat që po ndodhin janë pjesë e një zinxhiri që tanimë është futur në një ritëm tërësisht tjetër të vetë zhvillimit”, tha kryeministri.
Kjo qendër do të ofrojë trajnime profesionale për deri në 400 studentë njëkohësisht, në fusha si aktrimi, regjia, animacioni, prodhimi, shkrimi dhe më shumë. Po ashtu do të shërbejë edhe si një urë lidhëse mes industrisë krijuese dhe tregut ndërkombëtar.
