Kuvendi i Shqipërisë ka nisur në orën 10:00 të së enjtes diskutimet për Buxhetin e vitit 2018. Kryeministri Edi Rama ka nisur prezantimin e buxhetit ndërkohë që në fjalën e tij ai tha se në thelb është shtetbërja, punësimi dhe mirëqenia.
Sipas Ramës, Shqipëria sot ka rritjen më të lartë ekonomike në rajon.
“Këtë e thotë edhe Bashkimi Evropian. Dëshiroj të nënvizoj se për ne këto shifra nuk duan të thonë aspak se njerëzit duhet të duartrokasin qeverinë. Ne nuk jemi aspak të lumtur për shkak se duam shumë më tepër. Me projektbuxhetin e vitit 2018 ne vendosim një bazë të re për të bërë shumë më tepër” – tha Rama.
Seanca e sotme pritet të shoqërohet me debate ndërsa janë regjistruar një numër i madh deputetësh për të diskutuar.
“Projektbuxheti do të fokusohet tek shtetbërja, punësimi dhe mirëqenia. Ekonomia shqiptare po rritet në mënyrë të qëndrueshme, kemi prekur kufirin e 4%. Të gjitha të dhënat e besueshme konfirmojnë se kemi një gjallërim të kërkesës së brendshme private. Investimet e huaja direktë janë rritur me 18% krahasur me një vit më parë. ” – tha kryeministri në Kuvend.
Sipas tij, i ndjeshëm është edhe përmirësimi i bilancit të shkëmbimeve tregtare, me eksportet që rezultojnë me një rritje prej 13 për qind, ndërsa importet 6.3 për qind.
Gjithashtu, “ka rritje të punësimit me mbi 13 për qind për 6 mujorin e parë. Niveli aktual i treguesit të ndjesisë ekonomike qëndron 14 pikë mbi mesataren afatgjatë dhe mbi 17 pikë mbi atë të afatshkurtër”, ka vijuar Rama.
Kreu i qeverisë ka theksuar se buxheti është ndërtuar i tëri me përgjegjësi dhe realizëm, duke përmendur këtu edhe shifrat e regjistruara.
“Mjafton të shohim të ardhurat nga tatimet dhe doganat që janë rritur me 7 për qind, ndërsa ato nga kontributet shoqërore me 10 për qind. Në tërësinë e vetë rritja reale ekonomike pritet të jetë 3.9 deri në 4 për qind”, ka vijuar Rama.
Rama ka saktësuar se do të jenë 86 miliardë lekë investime publike, pa përfshirë këtu programin 1 miliard për rindërtim, që ka nisur të zbatohet me projektin për rrugën e Arbrit.
Ndërkohë, investimet do të prekin edhe sektorin e arsimit, pa harruar atë të bujqësisë dhe turizmin, me kryeministrin që ka nënvizuar se kjo fushë ka nevojë për promovimin e strukturave të hotelerisë me 5 yje.
Buxheti garanton edhe zbatimin e reformës në drejtësi, si dhe më shumë investime për Policinë e Shtetit, e cila do të pajiset me aparatura teknologjike me qëllim zbardhjen e krimeve./JavaNews/b.d
